Dhe pse sot ne kemi mënyra të shumta për ruajtjen e të dhënave, teknologjia e disqeve optike nuk kanë reshtur së zhvilluari. Një punim i publikuar së fundmi shpjegon se si prodhuesit mund të krijojnë disqe të ngjashme me DVD që kanë një hapësirë ruajtëse disa qindra ose mijëra herë më të madhe.
Studiuesit në Universitetin e Shangait kanë zhvilluar një disk optik me një kapacitet prej mbi një petabit, ekuivalente me mbi 100 terabajt. Edhe pse teknologjia është propozuar kryesisht për përdorim në ndërmarrjet e mëdha, ajo mund të bëhet potencialisht e aksesueshme për konsumatorët pas tejkalimit të pengesave të rëndësishme. Shkencëtarët ishin në gjendje të rrisnin ndjeshëm kapacitetin e një disku optik duke zbatuar një arkitekturë regjistrimi planar 3D.
Teknologjia përdor një film fotorezistent shumë transparent dhe uniform të stimuluar nga lazerët femtosecond. Kjo bën të mundur që qindra shtresa të mbivendosen një mikrometër larg njëra-tjetrës në një disk me të njëjtën trashësi si një DVD ose Blu-ray. Disqet më të avancuara Blu-ray mbështesin deri në katër shtresa, që zakonisht mbajnë rreth 100 gigabajt të dhëna. Për krahasim, studiuesit pohojnë se formati i tyre i ri mund të regjistrojë 100 shtresa në të dy anët e diskut për një kapacitet prej 1.6 petabit ose rreth 200 terabajt.
Mbivendosja e shumë disqeve të tilla mund të zvogëlojë qendrat e ruajtjes së të dhënave, të cilat momentalisht zënë shumë hapësirë. Konsolidimi i serverëve do të ulte gjithashtu në mënyrë drastike konsumin e energjisë. Një avantazh tjetër i mundshëm është jetëgjatësia – studiuesit pretendojnë se disqet petabit mund të zgjasin 50 deri në 100 vjet. Megjithatë është e rëndësishme që të bëhen përparime dhe në teknologjinë e leximit të këtyre disqeve.
