Pasi paketa e madhe e përmirësimit të McLaren ndihmoi Lando Norris të merrte fitoren e tij të parë në Formula 1 në Miami, Ferrari dhe Mercedes do të përpiqen të rikthehen në Imola me pjesë të reja të rëndësishme.
Beteja më e fortë e 2024-ës që shumë parashikuan para fillimit të sezonit më në fund po kërcënon të materializohet me ritmin mahnitës të Norris në Florida duke sugjeruar që McLaren do të jetë në gjendje të sfidojë Red Bull në pista që i përshtaten MCL38. Ndërsa Max Verstappen ka fituar katër nga gjashtë garat e para në një fillim të fortë në përpjekjen e tij për një titullin e katërt radhazi të pilotëve, Ferrari gjithashtu ka prodhuar ritëm të mjaftueshëm për të sfiduar Red Bull-in, veçanërisht kur Carlos Sainz udhëhoqi skuadrën italiane në Australi.
Duke folur pas garës në Miami, drejtori i ekipit të Ferrarit, Fred Vasseur këmbënguli se ai nuk priste një “përmirësim të rrënjësishëm” për sa i përket sezonit në tërësi, por pranoi se pjesët e reja kanë potencialin për të rritur rezultatet në një kohë të shkurtër. Disa persona kishin spekuluar se Ferrari kishte planifikuar të prezantonte një paketë të parë të përmirësimit të rëndësishëm në Itali, ku skuadra është gjithmonë nën presionin e shtuar të tifozëve dhe mediave kombëtare. Megjithatë, Çmimi i Madh i Emilia Romagna, duke qenë gara e parë evropiane e sezonit në kalendarin aktual, vepron si një pikë hyrëse e natyrshme për përmirësime.
Nga ana tjetër Mercedes prezantoi disa pjesë të reja në Miami, por ndryshimet e tyre u lanë në hije kur McLaren zbuloi një makinë pothuajse krejt të re. Ndryshimi kryesor në Miami ishte një dysheme e përditësuar, ndërkohë që pati edhe një “rregullim të vogël” në amortizatorët e përparmë.
