Instagram po sinjalizon një ndryshim të rëndësishëm në mënyrën se si përdoruesit ndërveprojnë me algoritmin e përmbajtjes , një temë që prej vitesh ka qenë burim frustrimi. Në një postim të fundit, drejtuesi i Instagram, Adam Mosseri, prezantoi ide të reja për zgjerimin e funksionit “Your Algorithm”, i cili u lejon përdoruesve të përcaktojnë çfarë duan të shohin më shumë në feed-in e tyre.
Shërbimi “Your Algorithm” u prezantua vitin e kaluar dhe gradualisht është shtrirë në hapësira të ndryshme të aplikacionit. Tani, Instagram dëshiron ta çojë një hap më tej. Sipas Mosseri-t, synimi është që ky opsion të mos jetë më thjesht një cilësim i fshehur në menu, por një element qendror i përvojës në platformë. “Disa nga këto po testohen tani, disa do të vijnë së shpejti, dhe disa ndoshta nuk do të ofrohen fare,” pranoi ai, duke lënë të kuptohet se bëhet fjalë për një fazë eksperimentimi.
Shembujt e publikuar tregojnë disa skenarë interesante, njëri parashikon që përdoruesi, duke tërhequr poshtë feed-in, të hapë drejtpërdrejt menunë e “Your Algorithm”. Një tjetër sugjeron që një swipe up nga një Reel mund të shfaqë një prompt personalizimi. Ndërkohë, një ide e tretë shfaq butona poshtë çdo Reel-i, ku përdoruesit mund të tregojnë nëse duan të shohin më shumë përmbajtje të ngjashme apo jo.
Por reagimi i komunitetit ka qenë i menjëhershëm dhe i njëtrajtshëm. Komenti më i përsëritur nën postimin e Mosseri-t ishte i drejtpërdrejtë: “Ne thjesht duam që algoritmi të na tregojë njerëzit që ndjekim.” Ky reagim nënvizon hendekun mes vizionit të Instagram për zbulim përmbajtjeje dhe dëshirës së përdoruesve për një feed më kronologjik dhe më personal.
