Shkencëtarët japonezë kanë zhvilluar sensorë ultra të hollë që ngjiten direkt në lëkurë dhe janë praktikisht të padukshëm, një teknologji që mund të ndryshojë mënyrën se si monitorohet shëndeti në të ardhmen. Studimi është publikuar në revistën Science Advances.
Pajisjet e reja janë rreth 400 deri në 500 herë më të holla se një fije floku, me një trashësi prej vetëm 200 nanometrash. Falë materialeve transparente dhe elastike, ato përshtaten me teksturën dhe ngjyrën natyrale të lëkurës, duke qenë të padukshme si për përdoruesin ashtu edhe për njerëzit përreth.
Sipas ekipit nga Universiteti i Tokios, një nga problemet kryesore të sensorëve aktualë është se ato ndryshojnë pamjen e personit dhe mund të ndikojnë në sjelljen e tij. Kjo është veçanërisht problematike kur monitorohen sinjale biologjike si lëvizjet e syve, aktiviteti i muskujve të fytyrës apo aktiviteti i trurit, pasi vetë prania e sensorit mund të ndikojë në rezultatet e matjeve.
Testimet treguan se sensorët e rinj janë pothuajse të pamundur të dallohen me sy apo me prekje. Ata janë gjithashtu të rehatshëm, lejojnë lëkurën të marrë frymë dhe funksionojnë në mënyrë efektive në tipe të ndryshme lëkure.
Pavarësisht përmasave minimale, performanca nuk është komprometuar. Studiuesit arritën të regjistronin me sukses sinjale nga lëvizjet e syve (EOG), aktivitetin e muskujve të fytyrës (EMG) dhe aktivitetin elektrik të trurit (EEG). Në disa raste, cilësia e sinjalit ishte edhe më e mirë se ajo e elektrodave tradicionale me xhel, falë kontaktit më efikas me lëkurën.
Teknologjia mund të gjejë përdorim jo vetëm në monitorimin e vazhdueshëm të shëndetit, por edhe në ndërveprimin mes njerëzve dhe pajisjeve inteligjente. Në të ardhmen, sensorët mund të përdoren për të analizuar gjendjen emocionale, funksionet njohëse, si edhe për të kontrolluar pajisje apo sisteme të realitetit virtual përmes lëvizjeve të syve dhe shprehjeve të fytyrës.
