Pas vitesh plot sfida me cilësinë, Ford po bën një autokritikë të rrallë publike. Në qendër të problemit ishte mbështetja e tepruar te automatizimi dhe inteligjenca artificiale në dizajn dhe prodhim. Ford kishte supozuar se sistemet e automatizuara dhe AI do të garantonin cilësi të lartë, por realiteti doli ndryshe. Modelet ishin po aq të mira sa të dhënat me të cilat trajnoheshin, ndërsa kompania nënvlerësoi rëndësinë e përvojës njerëzore të inxhinierëve veteranë.
“Në mënyrë të gabuar menduam se thjesht duke futur AI dhe duke rregulluar kërkesat e dizajnit do të prodhonim automatikisht produkte cilësore,” pranoi Charles Poon, zëvendëspresident i inxhinierisë së harduerit të automjeteve. Pushimi i inxhinierëve me përvojë, përpara se njohuritë e tyre të përktheheshin plotësisht në sisteme automatike, çoi në rënie të cilësisë dhe rritje të problemeve. Si pasojë, Ford u detyrua të rikthejë ose të punësojë mbi 350 inxhinierë me përvojë për të rindërtuar këtë “shtresë njohurie”, për të trajnuar ekipet e reja dhe për të përmirësuar vetë sistemet AI.
Sfidat u reflektuan edhe në rritjen e recall-eve, problemet me modelet Explorer dhe Aviator, si dhe ndërprerjet e zinxhirit të furnizimit gjatë pandemisë. Sipas COO-së Kumar Galhotra, kompania kishte rënë në një qasje “gjej dhe rregullo”, duke zgjidhur defektet pasi shfaqeshin, jo duke i parandaluar ato.
Sot, Ford po ndryshon filozofi. Ekipet e softuerit, prodhimit dhe zinxhirit të furnizimit po bashkëpunojnë, është krijuar një ekip i dedikuar sigurie softuerike dhe janë shtuar mbi 100 mijë teste të automatizuara me AI.
