Ideja e komandimit të telefonin inteligjent me sytë tuaj mund të tingëllojë si teknologji nga filmat më të fundit të fantashkencës. Por kjo gjë do të bëhet realitet për miliona përdorues të iPhone dhe iPad në mbarë botën së shpejti.
Apple ka konfirmuar se po mundëson gjurmimin e syve si në iPhone ashtu edhe në iPad. Duke përdorur inteligjencën artificiale (AI), mjeti do t’i lejojë përdoruesit të kontrollojnë pajisjen e tyre Apple duke përdorur vetëm sytë.
“Eye Tracking përdor kamerën e përparme për t’u konfiguruar dhe kalibruar në sekonda, dhe me machine learning në pajisje, të gjitha të dhënat e përdorura për konfigurimin dhe kontrollin e këtij shërbimi mbahen të sigurta në pajisje dhe nuk ndahen me Apple.” shpjegoi kompania.
Shërbimi i gjurmimit të lëvizjes së syve ishte një nga disa shërbimet e reja të aksesueshmërisë të prezantuara nga Apple këtë javë. “Ne besojmë thellë në fuqinë transformuese të inovacionit për të pasuruar jetët”, tha shefi ekzekutiv i Apple, Tim Cook. “Kjo është arsyeja pse për gati 40 vjet, Apple ka mbrojtur dizajnin gjithëpërfshirës duke përfshirë aksesueshmërinë në thelbin e harduerit dhe softuerit tonë. Ne po i shtyjmë vazhdimisht kufijtë e teknologjisë dhe këto veçori të reja pasqyrojnë angazhimin tonë të gjatë për të ofruar përvojën më të mirë të mundshme për të gjithë përdoruesit tanë.”
Eye Tracking funksionon në aplikacionet iPadOS dhe iOS dhe nuk kërkon ndonjë pajisje ose aksesorë shtesë. Pasi të jetë konfiguruar, përdoruesit mund të lundrojnë nëpër aplikacione dhe të përdorin Dwell Control për të aktivizuar çdo element, duke aksesuar funksione shtesë si butonat fizikë, rrëshqitjet dhe gjestet e tjera vetëm me sytë e tyre.
Shërbimi i ri do të lançohet më vonë gjatë këtij viti, por tashmë ka tërhequr vëmendje të madhe në X. “Është një lajm i mrekullueshëm për njerëzit me aftësi të kufizuara të caktuara, por për pjesën tjetër do të thotë të bëhemi më dembelë se sa jemi ”, shkroi një përdorues në X.
