TikTok po u jep disa përdoruesve mundësinë për të publikuar video 60 minuta të gjata në platformë. Kjo gjë mund të sjellë telashe për YouTube dhe gjigantë të tjerë të transmetimit.
Ky testim u pikas fillimisht publikisht nga analisti i mediave sociale Matt Navarra. TikTok konfirmoi më pas këtë shërbim për mediat të enjten. Është e paqartë se në cilat rajone disponohet përditësimi dhe nëse do të jetë i aksesueshëm për më shumë përdorues.
Kompania tregoi për TechCrunch se nuk kishte plane të menjëhershme për ta bërë funksionin gjerësisht të disponueshëm. Përditësimi është përpjekja më e fundit e platformës së mediave sociale në pronësi kineze për të zgjeruar ofertat e produkteve të saj ndërsa rritja e përdoruesve po ngadalësohet.
Kur u lançua për herë të parë, platforma i lejoi krijuesit të postonin vetëm video 60 sekonda. Kufiri tani është 10 minuta për të gjithë përdoruesit dhe 15 për disa krijues. Konkurrentët e TikTok, “Instagram Reels” dhe “YouTube Shorts” ofrojnë gjatësi të ngjashme krijimesh për t’u publikuar.
Megjithatë ky testim i ri do ta vendoste TikTok në të njëjtën kategori me YouTube. Kjo do t’i lejonte krijuesit e përmbajtjeve të ngarkojnë video më të gjata, si p.sh. shpjegimet e mësimeve, të cilat janë tepër të klikuara në YouTube.
