Një teknikë e re po sfidon një nga parimet më bazike të kafesë espresso, se ajo duhet patjetër të përgatitet me ujë shumë të nxehtë. Studiues nga UNSW Sydney kanë treguar se një “shot” espresso mund të realizohet edhe pa nxehtësi, duke përdorur valë zanore me frekuencë të lartë. Metoda quhet ultrasonic espresso dhe zëvendëson energjinë termike me energji mekanike.
Procesi funksionon në temperaturë ambienti dhe përdor ultratinguj për të nxjerrë aromat, vajrat dhe kafeinën nga kafeja e bluar imët. Edhe pse nis me ujë të ftohtë, intensiteti i ekstraktimit arrin nivele të krahasueshme me espresso tradicionale për më pak se tre minuta. Pajisja përdor një filtër standard espresso, ku vendoset një transduktor metalik që lëshon valë zanore mbi pragun e dëgjimit njerëzor.
Këto valë shkaktojnë një fenomen të quajtur kavitacion akustik, ku flluska mikroskopike formohen dhe shpërthejnë pranë grimcave të kafesë, duke krijuar impulse force që përshpejtojnë çlirimin e përbërësve të shijes. Në thelb, nxehtësia zëvendësohet nga një lloj nxitje mikroskopike të kontrolluar, që arrin të njëjtin efekt ekstraktimi.
Sipas studiuesve, përfitimet janë veçanërisht të mëdha në shkallë industriale. Në prodhimin e espresso-s, shmangia e ngrohjes së ujit mund të ulë konsumin e energjisë deri në 75%. Për më tepër, fakti që kafeja prodhohet në temperaturë ambienti e bën më të lehtë integrimin e saj direkt në pije të ambalazhuara ose produkte me qumësht.
Ekipi kërkimor, i udhëhequr nga Francisco Trujillo, optimizoi me kujdes faktorë si madhësia e bluarjes, raporti ujë–kafe dhe koha e ekspozimit, duke gjetur se dritarja ideale është rreth 2.5–3 minuta. Për të testuar shijen, rreth 100 konsumatorë kafeje morën pjesë në një provë, rezultatet e së cilës u publikuan në Journal of Food Engineering. Ata nuk arritën të dallonin në mënyrë të besueshme espresso tradicionale nga ajo ultrasonike, ndërsa versioni ultrasonik i kafesë filter u vlerësua edhe më pozitivisht.
Studimi sugjeron se nxehtësia nuk është domosdoshmërisht thelbësore për espresso, duke hapur një perspektivë krejtësisht të re për mënyrën se si mund të prodhohet kafeja në të ardhmen.
