Meta ka prezantuar syze inteligjente të reja me çmim prej $299, duke zgjeruar më tej opsionet e saj në tregun e pajisjeve të veshshme. Produkti i ri vjen me një çmim të paktën 80 dollarë më të ulët se gjenerata e dytë e syzeve Meta Ray-Ban, ndërsa CEO-ja i kompanisë, Mark Zuckerberg, vazhdon të investojë fuqishëm në të ardhmen e teknologjisë së veshshme.
Syzet e reja janë zhvilluar në bashkëpunim me EssilorLuxottica, por ndryshe nga modelet e mëparshme nuk mbajnë markën Ray-Ban apo Oakley. Meta synon të tërheqë një audiencë më të gjerë në një treg që po fiton gradualisht terren falë avancimeve në inteligjencën artificiale dhe realitetin e shtuar.
Syzet përfshijnë një buton fizik dhe kontrolle hands-free për aktivizimin e shpejtë të Meta AI, altoparlantë open-ear për telefonata, muzikë, podkaste dhe audiolibra, si edhe një sistem me shumë mikrofona që redukton zhurmën e erës. Pajisja është e certifikuar me rezistencë IPX4 ndaj ujit, ndërsa kamera mund të realizojë foto 12 MP dhe video 3K UHD, duke mbështetur edhe slow motion dhe timelapse. Përdoruesit mund të ndajnë menjëherë foto dhe video përmes Messenger, WhatsApp, Instagram dhe Facebook, ndërsa funksioni i përkthimit në kohë reale mbështet 20 gjuhë të ndryshme. Syzet ofrojnë gjithashtu 32 GB hapësirë ruajtjeje, e mjaftueshme për më shumë se 1,000 fotografi ose mbi 100 video me gjatësi 30 sekonda.
Meta dhe EssilorLuxottica dominojnë aktualisht tregun e syzeve inteligjente, duke kontrolluar mbi 80% të tregut dhe duke shitur miliona njësi që nga debutimi i parë në vitin 2021. Kompania i konsideron këto produkte si një hap drejt syzeve të së ardhmes me ekrane të integruara dhe fuqi të plota kompjuterike. Vitin e kaluar Meta prezantoi modelin Ray-Ban Display Glasses me ekran të integruar dhe çmim prej $799.
Lëvizja vjen në një moment kur konkurrenca po intensifikohet. Google po zhvillon syze inteligjente me modelin Gemini AI në partneritet me Warby Parker, ndërsa Snap zbuloi së fundmi Specs, syze me vlerë $2,195 që kompania i sheh si zëvëndësuesit e smartfonëve.
Përveç tre dizajneve të reja, Meta prezantoi edhe një bazë të re karikimi, duke e bërë ofertën e saj më tërheqëse për konsumatorët që kërkojnë një hyrje më të përballueshme në botën e syzeve inteligjente.
