Google njoftoi të hënën se do të prezantojë syzet e para të pajisura me inteligjencë artificiale në vitin 2026, një hap strategjik për të konkurruar më fuqishëm me Meta në tregun gjithnjë e më të nxehtë të pajisjeve AI.
Kompania po bashkëpunon për dizajnin e harduerit me Samsung, Gentle Monster dhe Warby Parker, me këtë të fundit Google ka një marrëveshje prej 150 milionë dollarësh të nënshkruar në maj. Sipas dokumenteve të Warby Parker, modelet e para të syzeve të tyre të përbashkëta pritet të dalin pikërisht në 2026.
Google po zhvillon dy lloje syzesh AI:
- Syze vetëm me audio, që u mundësojnë përdoruesve të komunikojnë me asistentin Gemini.
- Syze me ekran të brendshëm në lente, të afta të shfaqin informacione si udhëzime navigimi, përkthime gjuhësore dhe të dhëna të tjera kontekstuale.
Ndërsa syzet me audio pritet të mbërrijnë vitin e ardhshëm, Google nuk ka specifikuar ende cilat modele do të prezantohen fillimisht. Të gjitha pajisjet do të funksionojnë mbi Android XR, sistemi operativ i Google për headset-et dhe pajisjet hibride të realitetit të avancuar.
Rikthimi në tregun e smart glasses vjen pas deklarimeve të bashkëthemeluesit Sergey Brin, i cili në maj pranoi dështimet e së kaluarës me Google Glass, kryesisht për shkak të AI më pak të zhvilluar në atë kohë dhe mungesës së eksperiencës në zinxhirin e furnizimit që solli çmime të larta. Sipas Brin, sot potenciali i AI i bën syzet më të dobishme, më pak shpërqendruese dhe shumë më funksionale.
Tregu i syzeve inteligjente po zgjerohet shpejt, me Meta si lidere aktuale falë suksesit të syzeve Ray-Ban Meta, të cilat integrojnë Meta AI dhe, së fundmi, një model me ekran të vogël në lente. Gjithashtu, kompani si Snap dhe Alibaba po shtojnë produktet e tyre, duke e bërë tregun më konkurrues.
Google prezantoi edhe përditësime të reja softuerike për Galaxy XR, duke përfshirë lidhjen me PC Windows dhe një “travel mode” për përdorim në avionë dhe makina.
