Për të rritur sigurinë e të dhënave të ruajtura në mënyrë dixhitale si dhe mbrojtën nga kërcënime të ndryshme dixhitale, Drejtori i Përgjithshëm i Autoritetit Kombëtar për Sigurinë Kibernetike (AKSK) i Shqipërisë, z. Igli Tafa, dhe homologu i tij italian, z. Bruno Frattasi, Drejtor i Agjencisë Italiane për Sigurinë Kibernetike nënshkruan një marrëveshje bashkëpunimi në datën 27 shtator.
Një qëllim i përbashkët i dy shteteve është ndarja e praktikave më të mira të mbrojtjes kibernetike, shkëmbimi i informacioneve të marra rreth kërcënimeve në botën virtuale nga ekspertiza dhe përvoja e të dyja vendeve si dhe forcimi i kapaciteteve teknologjike.
Synimi është bashkimi i forcave për të parandaluar dhe menaxhuar incidentet kibernetike, duke ulur sa më shumë të jetë e mundur rrezikun nga kërcënimet e shumta, si dhe zhvillimin e projekteve strategjike të përbashkëta.
Drejtori i Përgjithshëm i AKSK, z. Igli Tafa, theksoi rëndësinë e këtij bashkëpunimi, duke thënë: “Sot është një ditë e rëndësishme për vendin tonë, pasi arritëm të nënshkruajmë marrëveshjen e bashkëpunimit me shtetin italian për përmirësimin e hapësirës kibernetike të të dy vendeve. Ky bashkëpunim do të kontribuojë në ndarjen e përvojave dhe kërcënimeve kibernetike, të cilat tashmë janë pa shtetësi. Ndihma e përbashkët midis Italisë dhe Shqipërisë pritet të sjellë përmirësime të ndjeshme në sigurinë kibernetike të të dyja vendeve.”
