Përgjatë eventit të sotshëm të organizuar në Louvre në Paris para fillimit të Lojërave Olimpike, ku Geek Room ishte i pranishëm për të përcjellë drejtpërsëdrejti informacionet më të reja mbi produktet inovative të Samsung, kompania ka prezantuar disa produkte të reja, ndër të cilat janë seria e re e orave inteligjente Galaxy Watch 7, Galaxy Watch Ultra dhe unaza inteligjente Galaxy Ring.
Që të gjithë këto produkte janë të fokusuara në përmirësimin e monitorimit të shëndetit të përdoruesve, përmes ofrimit të informacioneve të personalizuara shëndetësore. Le të mësojmë më tepër rreth këtyre produkteve.
Galaxy Watch 7
Nëpërmjet serisë më të re të orave inteligjente të Samsung ju mund të krijoni një rutinë të re stërvitje e cila ju nxit çdo ditë të përmirësoni shëndetin tuaj. Përdoruesit mund të ndjekin me saktësi informacionet nga mbi 100 lloje të ndryshme stërvitjesh për të arritur qëllimet e tyre. Kjo do të jetë e mundur dhe falë sensorit të përmirësuar BioActive që rrit saktësinë e informacioneve të siguruara nga ora inteligjente.
Galaxy Watch 7 ruan formën ikonike rrethore e cila mund të kombinohet me rripa të ndryshëm me detaje shumëngjyrëshe. Brenda këtij trupi rrethor gjendet për herë të parë një procesor 3nm, duke mundësuar që CPU të jetë 3 herë më i shpejtë ndërkohë që është 30% më efikas me energjinë.
Një tjetër veçori që vjen për herë të parë në Galaxy Watch 7 është prania e një sistemi GPS me frekuencë të dyfishtë, që gjurmon me saktësi vendodhjen dhe në mjedise të vështira urbane.
Për t’ju ndihmuar të mos hapni telefonin tuaj sa herë merrni një njoftim, orat inteligjente sapo u bënë dhe më inteligjete falë Galaxy AI. Ju tashmëmund t’i përgjigjeni mesazheve shumë lehtë përmes përgjigjeve inteligjente të sugjeruara.
Watch 7 do të ofrohet në dy madhësi: 40 mm (ngjyrat jeshile dhe krem) dhe 44 mm (jeshile dhe argjend) dhe çmimi do të nisë nga 29,999 Lekë për madhësinë 40 mm (34,999 Lekë versioni LTE) dhe 34,999 Lekë (39,999 Lekë versioni LTE) për madhësinë 44mm.
Galaxy Watch Ultra
Versioni Ultra është tashmë ora më e fuqishme që Samsung ofron, duke arritur një nivel tjetër për sa i përket përvojave të stërvitjes dhe inteligjencës artificiale në këto produkte. Për ta bërë produktin sa më estetik dhe të fortë për t’u përdorur në çdo ambient të mundshëm, versioni Ultra ka një dizajn të ri “Cushion” katror që mbron ekranin rrethor.
Pikërisht kjo kornizë Titanium Grade 4 ofron rezistencë ndaj ujit deri në 10 ATM, për t’ju shoqëruar në të gjithë aktivitetet tuaja nën ujë. Galaxy Watch Ultra ofron gjithashtu një Zonë të përparuar të Personalizuar HR, në mënyrë që të mund të stërviteni në nivele optimale të intensitetit bazuar në aftësitë tuaja fizike.
Galaxy Watch Ultra operon në një gamë më të gjerë lartësish, nga 500 metra nën nivelin e detit deri në 9000 metra lartësi për të gjurmuar përvojat e avancuara të fitnesit si noti në oqean deri tek çiklizmi në mjedise ekstreme.
Me një ndriçim maksimal deri në 3,000 nits, ekrani siguron lexueshmëri dhe në ambiente me shumë dritë. Jetëgjatësia e baterisë do të jetë më e fuqishmja ndër të gjitha orat inteligjente të Samsung, pasi mund të arrijë deri në 100 orë duke përdorur “Kursimin e Energjisë” apo 48 orë duke përdorur kursimin e Energjisë Ushtrimore.
Galaxy Watch Ultra do të jetë i disponueshëm në një madhësi 47 mm në gri titanium, titanium i bardhë dhe titanium i argjendtë dhe do të vijë me një çmim prej 69,999 Lekë ekskluzivisht në versionin LTE.
Galaxy Ring
Samsung ka vendosur të ofrojë një mënyrë të re për monitorimin e shëndetit tonë përmes një kategorie të re produktesh që vijnë në formën e një unaze, të quajtur Galaxy Ring.
Galaxy Ring do të vijë në përmasa të ndryshme për t’iu përshtatur madhësive të ndryshme të gishtërinjve në ngjyrat titanium të zi, titanium të argjendtë, dhe të artë. Kjo pajisje do të jetë e përshtatshme për t’u mbajtur 24/7 në gishtin tuaj, pasi do të jetë shumë e lehtë, peshon 3 gram, do të vijë me jetëgjatësi baterie deri në 7 ditë, dhe me rezistencë ndaj ujit deri në 10 ATM.
Nëpërmjet kësaj unaze ju do të mund të kuptoni gjendjen tuaj ditore përmes Energy Score, e cila llogarit se sa cilësor ka qenë gjumi juaj gjatë ditëve të fundit dhe shfaq rezultatin në përqindje. Gjithashtu përmes algoritmeve të AI ofron më tepër të dhëna rreth gjumit tuaj.
Në të njejtën kohë unaza është e pajisur me sensorë të ndryshëm për të monitoruar ushtrimet tuaja ditore, rrahjet e zemrës, madje dhe të parashikojë ciklin tuaj menstrual duke u bazuar në ndryshimet e temperaturës trupore.
