Rregullatorët antitrust të Bashkimit Evropian po përgatiten për të aprovuar blerjen e Activision Blizzard nga ana e Microsoft gjatë javës së ardhshme. Sipas një raportimi nga Reuters bëhet e ditur se Komisioni Evropian me shumë mundësi do të aprovojë këtë vendim ditën e hënë, me datë 15 maj, dhe pse ka afat deri në datën 22 maj.
Ky vendim vjen pas marrëveshjeve të bëra nga Microsoft pak më parë gjatë këtij viti për të “zbutur shqetësimet” me rivalët më të mëdhenj të kompanisë si dhe me rregullatorët e tjerë në të gjithë botën. Një nga këto marrëveshje është dhe partneriteti 10 vjeçar me Nintendo për të sjellë Call of Duty në sistemet e Nintendo, si dhe ofrimi i lojrave Activision për Xbox në shërbimin Nvidia GeForce Now.
Gjithashtu Microsoft është i gatshëm për të ofruar dhe Call of Duty në PS6 nëse një pajisje e tillë do të prezantohet. Nëse BE e aprovon shitjen, do të jetë një fitore e madhe për Microsoft dhe Activision, të cilët sapo u përballën me bllokimin e kësaj marrëveshjeje në Mbretërinë e Bashkuar nga rregullatori CMA. Megjithatë Microsoft ka treguar se do ta apelojë këtë vendim në gjykatë.
Një tjetër problem i madh për kompaninë është dhe rregullatori amerikan Federal Trade Commission, i cili po përpiqet të ndalojë blerjen prej $69 miliardësh.
