Një investigim i mediave suedeze Svenska Dagbladet dhe Göteborgs-Posten ka ngritur shqetësime serioze për privatësinë lidhur me syzet inteligjente Meta Ray-Ban smart glasses, të zhvilluara nga Meta në bashkëpunim me Ray-Ban. Sipas raportimit, punonjës të jashtëm në Kenia kanë analizuar video shumë private të regjistruara nga përdoruesit, përfshirë pamje nga banjo, nuditet, përmbajtje seksuale dhe madje informacione personale si detaje bankare.
Këta punonjës janë pjesë e kompanisë kontraktore Sama, e cila merret me procesin e etiketimit të të dhënave (data labeling). Ky proces përdoret për të trajnuar sistemet e inteligjencës artificiale, pasi njerëzit shikojnë dhe përshkruajnë përmbajtjen e videove në mënyrë që algoritmet të mësojnë të identifikojnë objekte, situata dhe aktivitete. Sipas disa punonjësve, shumë prej videove duket se janë regjistruar kur njerëzit nuk ishin të vetëdijshëm se po filmoheshin.
Punonjësit thonë se nuk pritet që ata të vënë në dyshim materialin që analizojnë, pasi kjo mund të rrezikojë vendin e tyre të punës. Ndërkohë, Sama përballet edhe me një padi kolektive nga moderatorë përmbajtjeje që pretendojnë se janë ekspozuar ndaj materialeve traumatike pa kushte të përshtatshme pune.
Meta ka deklaruar se kushtet e përdorimit të shërbimeve të saj lejojnë që ndërveprimet me sistemet e inteligjencës artificiale të rishikohen nga moderatorë njerëzorë për qëllime përmirësimi të teknologjisë.
Syzet inteligjente u prezantuan në vitin 2023 dhe më vonë u përditësuan me funksione të avancuara AI. Popullariteti i tyre është rritur ndjeshëm, me mbi 7 milionë njësi të shitura në vitin 2025. Megjithatë, pajisja ka shkaktuar debat të madh për privatësinë, sidomos pasi disa përdorues kanë gjetur mënyra për të fshehur dritën që tregon se po bëhet regjistrim.
Ekspertët e privatësisë paralajmërojnë se zhvillime të tilla, përfshirë edhe mundësinë e njohjes së fytyrës dhe regjistrimit të vazhdueshëm të mjedisit, mund të krijojnë një rrjet të gjerë mbikëqyrjeje me pasoja serioze për privatësinë personale.
