Studiuesit në MIT kanë zhvilluar një teknikë të shpejtë të printimit 3D që përdor metal të lëngshëm për të printuar jashtëzakonisht shpejt.
Procesi mund të prodhojë objekte të mëdha alumini në disa minuta, ndërsa me shumë teknika ekzistuese do të duheshin orë të tëra për të përfunduar të njëjtin ndërtim. Teknologjia tashmë është përdorur për të krijuar këmbë tavoline, korniza karrigesh dhe pjesë të mobiljeve përkatëse. Quhet printim metalik i lëngshëm (Liquid Metal Printing) dhe përfshin vendosjen e aluminit të shkrirë përgjatë një rruge të paracaktuar në një shtrat me rruaza të vogla qelqi. Këto rruaza forcohen shpejt në një strukturë 3D. Studiuesit thonë se procesi i ri është të paktën dhjetë herë më i shpejtë se teknikat e krahasueshme të printimit 3D të metaleve.
Megjithatë, ky proces sakrifikon saktësinë për shpejtësinë dhe shkallën e printimit. Kjo është arsyeja pse studiuesit e kanë përdorur atë për të krijuar artikuj me rezolucion të ulët si këmbët e karrigeve dhe jo pjesë të ndërlikuara me gjeometri komplekse. Megjithatë teknologjia mund të shfrytëzohet mjaft mirë për të krijuar komponentë të strukturave të mëdha që nuk kanë nevojë për një saktësi shumë të lartë, si përshembull pjesët e mobiljeve por edhe komponentët për ndërtim dhe dizajn industrial.
Pavarësisht një pamje jo shumë fine, pjesët e bëra duke përdorur LMP janë të qëndrueshme dhe mund t’i rezistojnë përpunimit pas printimit, si përshembull shpimi, pasi LMP e mban materialin të shkrirë gjatë gjithë procesit, duke pakësuar shanset e plasaritjes dhe deformimit. Studiuesit rekomandojnë kombinimin e LMP me teknika të tjera për punë që kërkojnë shpejtësi dhe rezolucion të lartë.
“Shumica e botës sonë të ndërtuar – gjërat përreth nesh si tavolina, karriget dhe ndërtesat – nuk kanë nevojë për rezolucion jashtëzakonisht të lartë”, tha Skylar Tibbits, një autor i këtij projekti. Vlen gjithashtu të përmendet se kjo metodë printimi mund të punojë dhe me metale të tjera përveç aluminit. Studiuesit zgjodhën aluminin për shkak të popullaritetit të tij në ndërtim dhe faktit që ai riciklohet lehtësisht.
