Formula 1 sapo ka hyrë në një kapitull të ri ku teknologjia dhe strategjia ndërthuren më shumë se kurrë. Me ndryshimet e fundit, makinat nuk janë thjesht më të shpejta, por “më inteligjente” në menaxhimin e fuqisë. Nëse mendonit se DRS ishte gjithçka, përgatituni për një lojë krejt tjetër në pistë. Ja tre termat që do të dëgjoni në çdo garë këtë sezon.
1. Overtake Mode: “Butoni” i ri i parakalimit
Ky sistem zëvendëson teknikisht atë që dikur e njihnim si DRS, por tani gjithçka ndodh në motor, jo te krahët e makinës. Nëse një pilot është më pak se një sekondë larg makinës para, ai mund të aktivizojë një “shpërthim” energjie elektrike prej 350kW. Kjo është një rritje masive e fuqisë që vjen direkt nga bateria dhe motori elektrik MGU-K. Praktikisht, është si një power-up në lojërat elektronike që i jep pilotit shpejtësinë e nevojshme për të kryer parakalimin. Tashmë beteja nuk është kush hap krahun e pasmë, por kush e përdor energjinë më me mençuri.
2. Boost Mode: Strategjia e pastër e baterisë
Në vitin 2026, makinat e F1 marrin 50% të fuqisë së tyre nga energjia elektrike, që do të thotë se bateria është gjithçka. “Boost Mode” u lejon pilotëve të përdorin maksimumin e energjisë së mbetur në bateri për të sulmuar ose për t’u mbrojtur në çdo pjesë të pistës. Megjithatë, kjo energji harxhohet shumë shpejt dhe nëse e tepron, makina mbetet “pa frymë” në fund të kthesës. Pilotët tani duhet të llogarisin me saktësi se kur duhet ta harxhojnë dhe kur duhet të karikojnë baterinë. Është një lojë shahu me shpejtësi 300 km/h ku gabimi më i vogël kushton pozicionin.
3. Active Aero: Makinat që ndryshojnë formë
Kjo është ndoshta teknologjia më “geek” që kemi parë ndonjëherë në këtë sport, pasi krahët e makinës lëvizin vetë. Tani kemi dy gjendje: Z-Mode për kthesat, ku krahët hapen për të krijuar më shumë fërkim dhe stabilitet, dhe X-Mode për pjesët e drejta. Në X-Mode, krahët mbyllen për të zvogëluar rezistencën e ajrit, duke e bërë makinën të “çajë” erën si shigjetë. Ndryshe nga DRS, këtë mund ta përdorin të gjithë pilotët në pjesët e caktuara të pistës, jo vetëm ai që ndjek. Kjo i bën makinat më eficiente dhe garat shumë më të paparashikueshme në çdo metër.
Nga kjo fundjavë gara e parë e sezonit transmetohet në DigitAlb. Kualifikueset zhvillohen të shtunën në orën 06:00 në SuperSport 1, ndërsa gara e madhe transmetohet të dielën në orën 05:00 po në SuperSport 1.
