Një fëmijë ka lindur duke përdorur ADN e 3 prindërve për herë të parë në Mbretërinë e Bashkuar, siç raportohet nga rregullatori i fertilitetit në këtë vend. Pjesa më e madhe e ADN vjen nga 2 prindërit e fëmijës, ndërkohë që rreth 0.1% e kësaj ADN i përket një gruaje tjetër dhuruese.
Përdorimi i metodës së re të fertilizimit in-vitro përfshin marrjen e bërthamës së vezës nga mamaja e fëmijës, e cila më pas implantohet në vezën dhuruese e cila nuk ka një bërthamë por përmban ADN e shëndetshme mitokondriale të dhurueses.
Një gjë e tillë bëhet për të shmangur të gjitha sëmundjet e rënda mitokondriale në fëmijët e porsalindur. Këto sëmundje janë të pakurueshme dhe mund të jenë fatale brenda disa ditësh ose orësh nga lindja. Disa familje mund të kenë humbur disa fëmijë për shkak të këtij problemi dhe kjo teknikë duket se është zgjidhja e vetme e tyre për të lindur një fëmijë të shëndetshëm.
Problemet mitokondriale nuk arrijnë dot të fuqizojnë trupin dhe mund të shkaktojnë dëmtim të trurit, mosfunksionimin e zemrës apo verbëri.
Parlamenti i Mbretërisë së Bashkuar e aprovoi përdorimin e kësaj procedure në vitin 2015. Megjithatë doktorët tregojnë se janë një numër shumë i vogël fëmijësh të cilët kanë lindur në këtë shtet përmes programit Mitochondrial Donation Treatment (MDT). Një gjë e tillë është provuar dhe në Meksikë në 2016.
