Studiuesit në Kinë kanë krijuar disa lente kontakti inovative që u japin përdoruesve aftësinë për të parë dritën infra të kuqe—një spektër që zakonisht është i padukshëm për syrin e njeriut. Ndryshe nga syzet specifike për shikimin në errësirë, këto lente nuk kanë nevojë për burim energjie dhe lejojnë shikimin e njëkohshëm të dritës IR dhe asaj të dukshme.
Udhëhequr nga Prof. Tian Xue në Universitetin e Shkencës dhe Teknologjisë së Kinës, ekipi i studiuesve synon të zgjerojë aftësitë vizuale të njeriut. Drita infra e kuqe përbën një pjesë të madhe të rrezatimit diellor, por njeriu nuk arrin ta perceptojë natyrshëm. Lentet funksionojnë përmes “nano-grimcave“, që thithin dritën IR afër të dukshmes dhe e shndërrojnë në ngjyra të dukshme si e kuqe, jeshile apo blu.
Eksperimentet e mëparshme përfshinin injektimin e këtyre grimcave në sytë e minjve, por metoda e re i integron ato në lente kontakti të buta, duke qenë më pak invazive. Përdoruesit mund të dallonin sinjale IR, përfshirë ato në kodin Morse dhe drejtimin nga vinte drita. Shikimi IR përmirësohej me sy mbyllur, pasi qepallat bllokojnë më shumë dritën e dukshme sesa atë IR.
Aktualisht, lentet nuk janë mjaftueshëm të ndjeshme për të parë nivelet natyrore të IR apo për të ofruar vizion termik, por zhvillimet e ardhshme synojnë ta përmirësojnë këtë. Prof. Xue thekson përdorime të mundshme si marrja e mesazheve sekrete me IR apo ndihma për personat me daltonikë.
