Elon Musk, CEO i Tesla-s, njoftoi se shërbimi robotaxi i kompanisë pritet të nisë më 22 qershor në Austin, Teksas. Përmes një postimi në platformën X, Musk tha se do të udhëtojë nga Los Anxhelosi drejt Austin për prezantimin e shërbimit. Ai shtoi se udhëtimi i parë pa shofer nga fabrika e Tesla-s drejt shtëpisë së një klienti është planifikuar për ditëlindjen e tij, më 28 qershor. Megjithatë, ai theksoi se për shkak të shqetësimeve për sigurinë, data mund të shtyhet.
Tesla ka publikuar një video të shkurtër ku tregon testimet e automjeteve pa shofer në rrugët e Austin, duke përfshirë një Model Y të pajisur me teknologjinë më të fundit “Full Self-Driving” (FSD) pa mbikëqyrje njerëzore. Fillimisht, do të përdoren vetëm 10–20 robotaxi të tipit Model Y, të kufizuara përmes geofencing në zona të caktuara. Punonjësit e Tesla-s do të monitorojnë automjetet nga distanca.
Musk tha se për momentin nuk do të përdoret modeli futuristik “CyberCab”, i cili pritet të prodhohet vitin e ardhshëm. Krahas drejtimit të Tesla-s, Musk është edhe CEO i SpaceX, xAI dhe rrjetit social X. Ai së fundmi përfundoi drejtimin e Departamentit për Efikasitetin e Qeverisë, ku ndërmori shkurtime të mëdha në agjenci federale për të zvogëluar shpenzimet qeveritare.
Ndërkohë, grupe kundërshtuese të Musk, përfshirë “The Daën Project” dhe “Resist Austin”, kanë planifikuar protesta më 12 qershor në Austin për të theksuar shqetësimet mbi sigurinë e mjeteve elektrike të Tesla dhe funksioneve të saj të drejtimit autonom.
