Dreame, një kompani kineze e njohur kryesisht për prodhimin e fshesave elektrike, po hyn në një fushë krejt tjetër: supermakinat sportive elektrike. Modeli i tyre më i ri, Nebula NEXT 01 JET Edition, është një koncept ekstrem që synon të arrijë një përshpejtim rekord nga 0 në 100 km/h në vetëm 0.9 sekonda, një shifër që do ta bënte më të shpejtë se shumë nga makinat më të avancuara në botë.
Ky model është një version edhe më radikal i Next 01 EV, i cili tashmë pretendon rreth 1,900 kuaj fuqi. Ajo që e bën JET Edition të veçantë është përdorimi i një sistemi me dy raketa me karburant të ngurtë, që prodhojnë një shtytje prej 100 kN dhe reagojnë vetëm 150 milisekonda pasi shtypet pedali i gazit. Ky kombinim teknologjie e çon performancën në një nivel pothuajse të pabesueshëm.
Dreame pretendon se ka zhvilluar këtë teknologji për më shumë se një dekadë. Përveç fuqisë ekstreme, makina përfshin një arkitekturë inteligjente të shasisë, një sistem aktiv elektromagnetik të amortizimit, LiDAR me rezolucion shumë të lartë për të identifikuar pengesa si gropa dhe këmbësorë, si dhe aftësi autonome të nivelit L3+, që mundësojnë drejtim pothuajse të pavarur.
Megjithatë, ka skepticizëm rreth realizueshmërisë së këtij koncepti, sidomos për shkak të dizajnit futuristik dhe teknologjive të pazakonta si raketat. Edhe videoja promovuese duket tepër dramatike për të qenë plotësisht bindëse. Pavarësisht kësaj, prezantimi i modelit u mbështet nga figura të njohura si Sebastian Thrun, bashkëthemelues i divizionit eksperimental të Google.
Nëse ky versioni special nuk arrin të prodhohet, Dreame planifikon të sjellë modelin standard Next 01, një sedan elektrik me katër dyer që synon përshpejtim nga 0 në 100 km/h në 1.8 sekonda. Ky model pritet të dalë në treg në gjysmën e dytë të vitit 2027 dhe përbën një hap të madh për kompaninë në industrinë e automjeteve.
