Meta njoftoi të mërkurën se po shton shërbime të reja për editimin e videove të shkurtra në Meta AI, duke u mundësuar përdoruesve të ndryshojnë kostumet, lokacionet dhe stilet përmes komandave të gatshme të inteligjencës artificiale. Këto veçori e vendosin Meta-n në konkurrencë me kompani si Google dhe platforma të tjera të editimit me AI si Captions.
Mjetet e reja të editimit po prezantohen në aplikacionin Meta AI, faqen meta.ai dhe në aplikacionin Edits, që rivalizon CapCut, fillimisht vetëm në SHBA. Kompania tha se këto funksione janë frymëzuar nga modelet Movie Gen AI, megjithëse nuk është e qartë nëse këto modele janë në përdorim të drejtpërdrejtë.
Aktualisht, përdoruesit mund të zgjedhin nga 50 stile të paracaktuara për të redaktuar video 10-sekondëshe. Presetet përfshijnë efekte si stil “vintage comic book style”, të ndryshojnë ndriçimin në një ditë me shi apo të ndryshojnë veshjen në një uniformë astronauti. Videot e redaktuara mund të shpërndahen drejtpërdrejt në Facebook dhe Instagram nga aplikacionet Edits dhe Meta AI.
Meta njoftoi se gjatë vitit do të shtojë edhe më shumë opsione personalizimi, duke theksuar dëshirën për të nxitur krijimtarinë dhe argëtimin në mesin e përdoruesve. “Qëllimi ynë është që çdokush të eksperimentojë në mënyrë krijuese dhe të ndajë video të këndshme me familjen, miqtë apo ndjekësit,” shkroi Meta në blogun zyrtar.
Meta AI tashmë ofron veçori për gjenerimin e imazheve, dhe me këto përmirësime në video, synon të tërheqë më shumë krijues që përdorin aplikacione të palëve të treta.
