Kravata, një simbol i profesionalizmit dhe stilit të veshjes në mjedise si zyra, ngjarjet formale apo edhe në jetën e përditshme, mund të mos jetë aq e padëmshme sa mendohej. Një studim i vitit 2018, i publikuar në Neuroradiology, sugjeron se mbajtja e kravatës mund të kufizojë qarkullimin e gjakut në tru, duke shkaktuar dhimbje koke, marramendje dhe të përziera tek disa individë.
Historia e kravatës daton që nga dinastia Qin në Kinën e Lashtë, ku ajo përdorej nga ushtria mbretërore e perandorit Qin Shih Huang. Në ditët e sotme, kravata nuk ka funksion praktik, por është kthyer në simbol të statusit dhe shijes personale. Siç thekson John T. Molloy në librin Dress for Success (1975): “Më trego kravatat e një burri dhe do të të tregoj kush është – ose kush përpiqet të jetë.”
Studimi i përmendur përfshiu 30 burra të ndarë në dy grupe. Njëri grup mbante kravatë dhe tjetri jo, ndërsa truri i tyre skanohej përpara dhe pas vendosjes së saj. Rezultatet treguan se grupi me kravatë kishte një ulje mesatare prej 7.5% të qarkullimit të gjakut në tru, ndërkohë që grupi pa kravatë nuk tregoi asnjë ndryshim.
Sipas Steve Kassem nga Neuroscience Research Australia, kjo ulje nuk është shqetësuese për individët e shëndetshëm. Megjithatë, për ata me probleme ekzistuese si tension i lartë, enë gjaku të bllokuara apo qarkullim të dobët, sidomos në moshë të thyer apo duhanpirës, kjo mund të përbëjë rrezik.
