100 subjekte ose individë në Shqipëri kanë patur një vit të suksesshëm për sa i përket të ardhurave të fituara nga rrjetet sociale, duke fituar shuma të mëdha nga aktivitetet e tyre në rrjetet si Facebook, TikTok, YouTube, Instagram, Google dhe Paypal. Megjithatë Drejtoria e Hetimit mendon se ka disa parregullsi në deklarimin e fitimeve, prandaj ka nisur hetimet ndaj këtyre subjekteve.
Sipas deklaratave zyrtare të Administratës Tatimore, kontrolli paraprak tregon për një shumë të konsiderueshme të ardhurash të pashfaqura në deklaratat tatimore, që arrijnë në rreth 33 milionë euro.
Më 29 mars, përmes postimeve në rrjetet sociale, Administrata Tatimore ka ftuar të gjithë individët dhe subjektet që përfitojnë nga këto platforma të kryejnë vetëdeklarimin e të ardhurave përmes formularit DIVA 2024, në përputhje me legjislacionin në fuqi.
Autoritetet tatimore i kanë bërë thirrje personave që ende nuk kanë reaguar, të plotësojnë këtë detyrim ligjor pa vonesa, në mënyrë që të shmangin gjoba apo pasoja të tjera që mund të dalin nga hetimet më të thelluara.
Përmasat e të ardhurave të padeklaruara janë domethënëse, veçanërisht kur krahasohen me tregun tradicional të reklamave në Shqipëri, që sipas të dhënave zyrtare arrin në rreth 70 milionë euro, shumica e të cilave shkon për reklamat televizive.
Mënyrat kryesore të fitimit të të ardhurave nga rrjetet sociale janë:
- Reklamimet (Ad Revenue): Të ardhura nga klikimet dhe shikimet e reklamave në YouTube, Facebook, Instagram dhe faqe me Google AdSense.
- Sponsorizimet nga kompanitë: Promovimi i produkteve/shërbimeve në Instagram, TikTok, YouTube, etj.
- Shitja e produkteve/shërbimeve: Fitime nga shitja e produkteve fizike apo dixhitale (kurse, dizajne) përmes platformave si Instagram, Facebook, TikTok Shop, PayPal
- Shërbime Online: Pagesa për freelancing, dizajn, mësim online apo përkthime – zakonisht përmes PayPal ose Stripe
