Duke nisur nga data 13 mars, shqiptarët e kishin të pamundur të aksesonin TikTok pas një vendimi të menjëhershëm të qeverisë për mbylljen e platformës. Ministrja e Arsimit, Ogerta Manastirliu, komunikoi para disa muajsh se mbyllja e TikTok është pjesë e Planit të ri të Veprimit në Shkolla, dhe gjithçka nisi pas vrasjes tragjike të 14 vjeçarit Martin Cani pasi një sherri që nisi në rrjetet sociale, jo në TikTok por në Snapchat.
Kryeministri Rama gjatë prezantimit të Planit të ri të Veprimit në Shkolla tha se versioni ndërkombëtar i TikTok është shumë ndryshe nga ai kinez, pasi në versionin ndërkombëtar promovohen “rrugaçërira, perversitet, dhunë, bullizëm, thika, shpata, revole” ndërkohë që versioni kinez “i mëson përdoruesit si të bëjnë mirë mësimet, si të ruhet natyra, se si është tradita”.
Qytetarët ishin të ndarë në mendime, disa e përgëzonin këtë lëvizje me pretendimet se “TikTok po dëmtonte të rinjtë”, ndërsa shumë të tjerë citonin se mbyllja e TikTok nuk do të zgjidhte problemet e rinisë së sotme në Shqipëri.
Kjo pengesë në aksesimin e platformës ishte planifikuar të zgjaste rreth 12 muaj, pasi kryeministri tregoi se kjo kohë është e nevojshme që TikTok “të japë garancitë e nevojshme për filtrimin e përmbajtjeve jo të përshtatshme në platformë”.
Megjithatë, vetëm 3 muaj pas këtij vendimi, TikTok mund të aksesohet lirisht në Shqipëri pa patur nevojë për aktivizimin e një VPN, një metodë e cila ishte përdorur shpesh gjatë kësaj periudhe për të anashkaluar pengesat e qeverisë.
Edhe pse nuk ka asnjë lajmërim zyrtar rreth kësaj situate, me mijëra persona kanë raportuar se tashmë nuk hasin asnjë pengesë në aksesimin e përmbajtjeve në platformë. Sot, 26 qershor, ka ende ISP që nuk e kanë aktivizuar.
Për më shumë detaje, Geek Room pyeti zyrtarisht Autoritetin Kombëtar për Sigurinë Kibernetike (AKSK) nëse aksesi është kërkuar zyrtarisht dhe nëse po, cilat kushte ka plotësuar TikTok për t’u rihapur tre muaj pas mbylljes. Për momentin, 26 qershor 13:13, nuk kemi një përgjigje nga AKSK.
Përditësim, 28 qershor, 11:50
AKSK i përgjigjet zyrtarisht Geek Room: Në bazë të VKM nr 151, datë 6 mars 2025, ju njoftojmë që aksesi në platformën Tik Tok është i bllokuar në territorin e Republikës së Shqipërisë.
Po ju si mendoni, a u zgjidh me të vërtetë problemi me TikTok në Shqipëri, apo gjithçka mbetet njësoj siç ishte më parë?
