Shkencëtarët nga Universiteti i Teksasit në Austin kanë zhvilluar një pajisje të re për matjen e ngarkesës mendore: një tatuazh elektronik të vendosur në ballë. Pajisja është krijuar për të ndihmuar profesionistë në fusha si aviacioni dhe shëndetësia, ku vëmendja dhe përqendrimi janë vendimtare për të shmangur gabime fatale.
Për dallim nga pajisjet tradicionale EEG dhe EOG, që janë të mëdha, me tela dhe të ndjeshme ndaj lëvizjes, ky tatuazh është i lehtë, fleksibël dhe pa tela. Ai përbëhet nga një material përçues me bazë grafiti dhe ngjitet në ballë përmes një filmi përçues ngjitës. Katër elektroda EEG vendosen në ballë për të regjistruar aktivitetin e trurit, ndërsa elektrodat EOG rreth syve matin lëvizjet e syve.
Pajisja është e personalizueshme dhe njëpërdorimshme, ndërsa lidhet me një qark të ripërdorshëm dhe bateri të lehtë. Pas testimeve në 6 pjesëmarrës, studiuesit zbuluan se pajisja monitoron aktivitetin e trurit dhe lëvizjet e syve po aq mirë sa pajisjet tradicionale. Pjesëmarrësve iu kërkua të kryenin një detyrë me shkallë të ndryshme vështirësie, dhe të dhënat e mbledhura treguan se sa më e vështirë të ishte detyra, aq më shumë ndryshonte aktiviteti i trurit – tregues i një ngarkese më të madhe mendore.
Duke përdorur algoritme të inteligjencës artificiale, ekipi trajnoi një model që mund të parashikojë nivelin e ngarkesës mendore bazuar në të dhënat EEG dhe EOG. Pajisja pritet të kushtojë më pak se $200 dhe do të dërgojë paralajmërime përmes një aplikacioni kur ngarkesa mendore e përdoruesit është shumë e lartë.
Megjithatë, qëllimi nuk është të zvogëlohet gjithmonë vështirësia, pasi performanca optimale arrihet kur ngarkesa është në nivel mesatar, as shumë e ulët, as shumë e lartë.
