Meta ka njoftuar shtimin e një shërbimi të ri të mundësuar nga inteligjenca artificiale në WhatsApp, e cila mund të përmbledhë mesazhet e palexuara në një bisedë. Kjo veçori është opsionale dhe përmbledhja është e dukshme vetëm për përdoruesin, jo për pjesëmarrësit e tjerë në bisedë.
Funksioni i ri bazohet në teknologjinë e Meta AI, e cila u prezantua në prill dhe është projektuar të mos ndikojë në enkriptimin ose privatësinë e përdoruesit. Sipas kompanisë, “Message Summaries” përdor teknologjinë e përpunimit privat (Private Processing), që lejon AI-në të gjenerojë përmbledhje pa e parë Meta ose WhatsApp përmbajtjen e mesazheve apo përmbledhjeve.
Funksioni është i çaktivizuar si fillim, por WhatsApp do të tregojë një ikonë të vogël për të njoftuar nëse është në dispozicion për ju. Fillimisht, ky opsion do të jetë i disponueshëm vetëm në SHBA dhe në gjuhën angleze, me planifikim për zgjerim në vende dhe gjuhë të tjera më vonë gjatë vitit.
Deri tani, përdoruesit mund të përdornin Meta AI për të bërë pyetje të përgjithshme ose për të shtuar kontekst në një mesazh, por AI nuk kishte akses në përmbajtjen e mesazheve. Me këtë përditësim, WhatsApp mund të përdorë kontekstin e bisedave në mënyrë private për të përmbledhur mesazhe ose për të sugjeruar përgjigje të shkruara.
Veçoritë e reja mund të aktivizohen ose çaktivizohen nga menuja Settings > Chats > Private Processing, ku përdoruesit mund të zgjedhin cilat funksione të lejojnë.
