Shkencëtarët kanë nisur një projekt të ri që ka shkaktuar shumë debate: rikrijimin e ADN-së njerëzore nga e para. Ky projekt synon ndërtimin e një gjenome të plotë njerëzore nga përbërës kimikë, për të “shkruar” jetën në vend që thjesht ta lexojë apo modifikojë atë.
Financuar fillimisht me $13.7 milionë nga organizata bamirëse Wellcome Trust, projekti SynHG (Synthetic Human Genome Project) synon të krijojë kromozomin e parë njerëzor plotësisht sintetik, si dhe të zhvillojë teknologjitë, mjetet dhe protokollet e nevojshme për ndërtimin e gjeniomës. Ky është një projekt afatgjatë që pritet të zgjasë disa dekada.
Megjithëse mund të sjellë përfitime të mëdha – si zhvillimi i trajtimeve të reja mjekësore apo krijimi i bimëve rezistente ndaj klimës – projekti ngre shqetësime të thella etike. Kritikat përfshijnë frikën e krijimit të “bebeve të dizenjuara”, kufizimin e diversitetit gjenetik dhe pasojat afatgjata të ndërhyrjes në gjenet njerëzore pa kuptuar plotësisht ndërveprimin e tyre me mjedisin.
Për të adresuar këto dilema, SynHG përfshin një program të integruar të shkencave sociale të quajtur Care-full Synthesis, i cili do të analizojë aspektet etike, ligjore dhe sociale në shkallë globale. Udhëhequr nga Prof. Joy Zhang në Universitetin e Kentit, ky program synon përfshirjen e zërave të ndryshëm nga Europa, Azia, Afrika dhe Amerika, duke siguruar që zhvillimet shkencore të bëhen në mënyrë të përgjegjshme dhe gjithëpërfshirëse.
Ky projekt, i drejtuar nga Prof. Jason Chin dhe një ekip ndëruniversitar në Mbretërinë e Bashkuar, mund të transformojë jo vetëm bioteknologjinë dhe mjekësinë, por edhe mënyrën si e kuptojmë vetë jetën dhe njerëzimin.
