Gjatë kohëve të fundit kemi parë shumë raportime rreth zhvillimit të një kategorie të re produktesh nga ana e Apple. Ndërsa shumica e tyre i referohen pajisjeve të ngjashme me Galaxy Z Fold dhe Z Flip të Samsung, analisti Ming-Chi Kuo tani ka raportuar se Apple ka qenë duke punuar në mënyrë aktive në krijimin e një MacBook të palosshëm.
Detajet rreth këtij MacBook të ardhshëm të palosshëm janë ende të paqarta në këto momente. Megjithatë, Kuo thotë se pajisja do të ketë një ekran 20.3 inç. Sipas analistit, ky MacBook i ri është pajisja e vetme e palosshme e Apple “me një plan të qartë zhvillimi“, duke sugjeruar që planet e kompanisë për të lançuar një iPhone ose iPad të palosshëm janë ende mjaft eksperimentale.
“Kohët e fundit, kam marrë shumë pyetje nëse Apple planifikon të prodhojë në masë iPhone ose iPad të palosshëm në 2025 ose 2026. Anketa ime e fundit tregon se aktualisht, i vetmi produkt i palosshëm i Apple me një plan të qartë zhvillimi është MacBook 20.3 inç që pritet të hyjë në prodhim masiv në vitin 2027, “tha Kuo në një postim në X.
Kjo nuk është hera e parë që Apple është përfolur se po punon në një MacBook të palosshëm. Në vitin 2022, analisti i Display Supply Chain Consultants (DSCC) Ross Young zbuloi se kompania kishte eksploruar idenë e laptopëve të palosshëm. Në të njëjtin vit, Mark Gurman i Bloomberg konfirmoi raportin e Young dhe tha se Apple ishte e interesuar të lançonte një pajisje të palosshme me një ekran 20 inç.
Në fillim të këtij viti, The Information raportoi se Apple ka qenë duke eksploruar idenë e një iPhone të palosshëm që nga viti 2018 me dy prototipa të ndryshëm. Njëri prej tyre duket më shumë si një telefon i zakonshëm, ndërsa tjetri është më i ngjashëm me një iPad që paloset. Megjithatë, një bloger kinez tha se prototipet e Apple nuk arritën të kalonin testimin e cilësisë dhe projektet ishin “përkohësisht të pezulluara”.
