Lejimi i fëmijëve të vegjël të përdorin tableta ose të shikojnë TV për më shumë se 14 orë në javë, i vendos ata në rrezik ‘dukshëm’ më të lartë për të zhvilluar autizëm, sugjeron një studim i diskutueshëm sot. Shkencëtarët australianë zbuluan se dy-vjeçarët që kalojnë një pjesë të madhe të kohës duke parë ekrane kishin më shumë gjasa të shfaqnin simptoma të ngjashme me autizmin deri në moshën 12-vjeçare.
Ekspertët prej kohësh kanë ngritur alarmin për ndikimin negativ që ekspozimi për kohë të gjata para ekraneve sjell në zhvillimin e fëmijëve. Por studiuesit, të cilët vëzhguan më tepër se 5000 fëmijë, e pranuan se dokumenti ishte më tepër një observim dhe nuk mund të provonte këtë shkak. Shkencëtarë të tjerë sot i kërkuan publikut të mos panikosen dhe thanë se studimi dëshmon se ‘nuk ka prova aktuale’ që lidhin kohën e ekranit me autizmin.
Nuk dihet ende saktësisht se çfarë e shkakton autizmin, por ndonjëherë ai u transmetohet fëmijëve nga prindërit e tyre. Dhe studimet sugjerojnë se është më e zakonshme tek fëmijët e prindërve më në moshë, si dhe tek nënat që janë mbipeshë ose vuajnë nga komplikimet e shtatzënisë.
Në studimin e ri, studiuesit pyetën prindërit e 5107 fëmijëve se sa kohë kalonte fëmija i tyre përpara një ekrani çdo javë.
Në një pyetësor pasues kur fëmija i tyre ishte 12 vjeç, prindërit u pyetën nëse fëmija i tyre ishte diagnostikuar me autizëm. Ata zbuluan se 145 fëmijë ishin diagnostikuar me autizëm.
Duke shkruar në revistën, JAMA Pediatrics, studiuesit thanë se rreziku i autizmit ishte “dukshëm më i madh te fëmijët që shpenzonin më shumë se 14 orë kohë në javë para ekranit krahasuar me fëmijët me më pak se 14 orë kohë në javë para ekranit deri në dy vjet“.
Ata gjithashtu këshilluan mjekët që të pyesin për kohën e ekspozimit para ekranit gjatë fëmijërisë së hershme, si pjesë e një vlerësimi më të gjerë të zhvillimit të fëmijës.
