Shkencëtarët kanë zbuluar detaje të reja mbi mënyrën se si Alzhaimer përhapet nëpër tru dhe kanë gjetur provat e para të transmetimit midis njerëzve, nëpërmjet një hormoni të rritjes që tashmë është i ndaluar.
Studimi, i botuar në Nature Medicine të hënën, shqyrtoi një grup të vogël njerëzish që u trajtuan midis 1959 dhe 1985 me një hormon rritjeje të marrë nga kufomat. Studiuesit kanë theksuar se nuk gjetën prova që Alzhaimer ishte i transmetueshëm në jetën e përditshme ose në kujdesin e zakonshëm mjekësor, por gjetjet e tyre sugjerojnë se hormonet e rritjes të përdorura nga pacientët ishin të kontaminuar me proteina të një lloji të njohur si amyloid-beta.
Këto proteina, të cilat ngjiten së bashku dhe formojnë pllaka të dëmshme për qelizat e trurit, konsiderohen gjithnjë e më shumë si shkaku kryesor i Alzhaimer. Disa nga pjesëmarrësit në këtë studim kishin vdekur tashmë nga çrregullimi i trurit prej sëmundjes Creutzfeldt-Jakob (CJD), sepse infuzionet e tyre hormonale përmbanin proteina infektive të quajtura prione që shkaktojnë anomali të rënda në tru – por rezultatet treguan ngjashmëri midis evolucionit të Alzhaimer dhe CJD, duke nxitur kështu kërkimet për të diagnostikuar dhe trajtuar të gjitha format e demencës.
“Ky studim ka zbuluar më shumë informacione se si fragmentet e amiloidit mund të përhapen brenda trurit,” tha Susan Kohlhaas, drejtore ekzekutive e kërkimit dhe partneriteteve në Alzheimer’s Research UK Charity.
Studimi gjithashtu ekzaminoi tetë njerëz që kishin marrë hormonin si fëmijë, por nuk kishin zhvilluar CJD. Shkencëtarët zbuluan se pesë nga këta pacientë shfaqën simptoma në përputhje me fillimin e hershëm të Alzhaimerit. “Gjetjet tona sugjerojnë se Alzhaimer dhe disa probleme të tjera neurologjike ndajnë procese të ngjashme zhvillimi me CJD”, tha John Collinge, autori kryesor i studimit dhe profesor në University College London. “Kjo mund të ketë implikime të rëndësishme për të kuptuar dhe trajtuar sëmundjen e Alzhaimerit në të ardhmen“.
