Sipas një raporti të kohëve të fundit nga Circle Economy Foundation, vetëm 7.2% e materialeve të përdorura në të gjithë botën po rikthehen në treg përmes riciklimit pa krijuar mbetje. Kompania e bazuar në Milano, Krill Design synon ta ndryshojë këtë gjë duke krijuar orendi të bëra nga një biomaterial i patentuar i ngjashëm me plastikën që quhet Rekrill. Ky material është plotësisht organik, i biodegradueshëm dhe mund të përdoret vazhdimisht.
Kompania u themelua në vitin 2018 nga tre arkitektë, dy prej të cilëve kishin krijuar tashmë një kompani të printimit 3D. Duke përdorur lëkurën e frutave, farat e portokallit dhe mbetjet e bluara të kafesë të mbledhura nga bizneset në Itali, produktet Krill mund të rishpërndahen tek të njëjtat biznese për t’u përdorur në zyrat e tyre, në vend të mobilieve të bëra nga plastika e zakonshme.
Krill Design ofron librari, stol, orë, lojë me birila dhe një llambë të quajtur Ohmie. “Pas tre ose katër vjetësh, ju dëshironi të ndryshoni mobiliet tuaja,” thotë Marco Di Maio, drejtor në Krill. “Por nëse të gjitha ato mobilie do të krijoheshin duke përdorur materialet tona, ne do të ishim në gjendje t’i rikuperonim, t’i shtypnim dhe të printonim mobilie të tjera me të njëjtin material. Nëse, gabimisht, ndonjë nga materiali ynë përfundon në oqean, ai është i biodegradueshëm dhe nuk prodhon asnjë mikroplastikë.”
Çdo produkt prodhohet përmes një procesi me katër hapa. Së pari, mbetjet ushqimore thahen dhe grimcohen në një pluhur shumë të imët. Më pas, pluhuri përzihet me një alternativë plastike të biodegradueshme të njohur si polyhydroxybutyrat (PHB), me mbetjet e frutave që e bëjnë PHB më të ngurtë, sipas Krill. Komponimi më pas kthehet në një fije dhe futet në një printer 3D. Llamba Ohmie kërkon rreth tre orë për t’u printuar, por kohëzgjatja e printimit mund të ndryshojë në varësi të produktit.
Krill ka bashkëpunuar me një sërë markash të njohura, duke përfshirë kompaninë e pijeve Sanpellegrino dhe zinxhirin e hoteleve Four Seasons, dhe gjithashtu ka marrë pjesë në një projekt Co.ffee Era, i cili synon të reduktojë mbetjet e kafesë të prodhuara në tre prej lagjeve të qytetit.
