Inxhinierët në MIT kanë zhvilluar një pajisje të re të implantueshme që mund të sjellë një ndryshim të madh në trajtimin e hipoglicemisë tek personat me diabet tip 1. Pajisja është një rezervuar i vogël, sa madhësia e një monedhe, që vendoset nën lëkurë dhe mund të lëshojë automatikisht ose në distancë hormonin glukagon kur niveli i sheqerit në gjak bie në nivele të rrezikshme.
Për diabetikët tip 1, menaxhimi i sheqerit në gjak është sfidues. Sasia e tepruar e insulinës mund të shkaktojë hipoglicemi, që çon në konfuzion, konvulsione, madje edhe vdekje. Trajtimi standard është injeksioni i glukagonit, por shpesh është e vështirë të dallohet në kohë rënia e glukozës — sidomos gjatë gjumit apo tek fëmijët.
Pajisja e MIT e zgjidh këtë problem duke përdorur një rezervuar polimerik të printuar në 3D, që ruan glukagon në formë pluhuri, më i qëndrueshëm se lëngu. Ai mbyllet me një aliazh nikel-titaniumi, që hapet kur ngrohet në 40°C, i aktivizuar manualisht ose automatikisht përmes një monitori glukoze. Antena e saj merr sinjal radio, aktivizon rrymën elektrike që nxehet dhe hap rezervuarin për të liruar glukagonin.
Në testet laboratorike me minj diabetikë, pajisja riktheu nivelet normale të glukozës për më pak se 10 minuta. Ajo u testua gjithashtu me epinefrinë, e cila u lirua me sukses në gjak për emergjenca alergjike ose kardiake.
Prototipi funksionoi për deri në katër javë, por qëllimi është të zgjatet funksionaliteti në një vit. Testimet klinike priten brenda 3 viteve. Kjo teknologji mund të përdoret edhe për ilaçe të tjera emergjente, duke transformuar trajtimin akut në mjekësi.
