Një startup i quajtur Interlune po përpiqet të bëhet kompania e parë private që shfrytëzon burimet natyrore të Hënës dhe t’i shesë ato përsëri në Tokë. Interlune fillimisht do të fokusohet në grumbullimin e helium-3 – një izotop helium i krijuar nga dielli përmes procesit të shkrirjes – i cili është me bollëk në Hënë.
Në një intervistë me Ars Technica, Rob Meyerson, një nga themeluesit e Interlune dhe ish-presidenti i Blue Origin, tha se kompania shpreson të dërgojë pajisjet e nevojshme me një nga misionet e ardhshme komerciale në Hënë të mbështetur nga NASA. Plani është që të ketë një fabrikë pilot në Hënë duke nisur nga viti 2028 dhe të fillojë funksionimin nga viti 2030, tha Meyerson.
Interlune njoftoi këtë javë se ka mbledhur $18 milionë fonde, duke përfshirë 15 milionë dollarë në raundin e saj më të fundit të udhëhequr nga Seven Seven Six, firma e sipërmarrjes e nisur nga bashkëthemeluesi i Reddit, Alexis Ohanian. Elementi që po synohet të grumbullohet, helium-3, mund të përdoret në Tokë në fusha të ndryshme si llogaritja kuantike, imazherinë mjekësore dhe, ndoshta më vonë si lëndë djegëse për reaktorët.
Helium-3 bartet në Hënë nga erërat diellore dhe mendohet se ngec në sipërfaqje, ndërsa kur arrin në Tokë, bllokohet nga magnetosfera. Interlune synon të gërmojë sasi të mëdha të dheut në Hënë (quajtur ndryshe regolith), ta përpunojë atë dhe të nxjerrë gazin helium-3, të cilin më pas do ta dërgonte përsëri në Tokë.
Krahas pajisjes së saj hënore, Interlune po planifikon një mision zbarkues robotik për të vlerësuar përqendrimin e helium-3 në vendndodhjen e zgjedhur në sipërfaqe. “Për herë të parë në histori,” tha Meyerson në një deklaratë, “shfrytëzimi i burimeve natyrore nga Hëna është teknologjikisht dhe ekonomikisht e realizueshme“.
