Huawei i është bashkuar prodhuesve të mëdhenj si BMW, Mercedes, VW, BYD dhe Stellantis në kërkimin e baterive me gjendje të ngurtë për automjetet elektrike. Sipas CarNewsChina, kompania ka aplikuar për patentimin e një projekti që përshkruan një arkitekturë baterie me dendësi energjie prej 400–500 Wh/kg, që është 2–3 herë më e lartë se ajo e baterive aktuale në treg.
Edhe pse Huawei nuk prodhon makina me markën e vet në Kinë, ajo bashkëpunon me prodhues të ndryshëm për të aplikuar teknologjitë e saj në automjete. Patenta përshkruan një metodë që përfshin elektrolite me azot për të reduktuar reaksionet anësore në ndërfaqen me litiumin. Megjithatë, pjesa tjetër e teknologjisë mbetet e fshehtë, ndërsa gara për të prodhuar në masë dhe me siguri këtë teknologji vazhdon.
Huawei pretendon se mund të arrijë një autonomi prej 3,000 km me një karikim dhe karikim nga 10–80% në më pak se 5 minuta. Por ekspertët janë skeptikë. Profesori Yang Min-ho nga Universiteti Dankook thotë se këto performanca mund të arrihen vetëm në kushte laboratorike, pasi humbjet e energjisë dhe menaxhimi termik e bëjnë shumë të vështirë zbatimin në praktikë.
Kina, si lidere në industrinë e EV-ve, është duke promovuar fort teknologji të reja si karikimi Megawatt dhe bateritë me gjendje të ngurtë. Megjithatë, aplikimi në botën reale mund të kërkojë më shumë kohë dhe nuk do të jetë aq revolucionar sa pretendohet.
Në vend të baterive gjigante që peshojnë shumë për të arritur 3,000 km, më mirë do ishte prodhimi i baterive më të vogla me dendësi të lartë që ofrojnë mbi 1,000 km, çka është më se e mjaftueshme për shumicën e drejtuesve. Me përmirësimin e rrjeteve të karikimit, shqetësimi për distancën po zhduket gradualisht.
