Teknologjitë që kanë në fokus mbrojtjen e të dhënave të përdoruesve, si GrapheneOS, mund të përdoret për qëllime të mira apo të këqija. Kjo po bëhet e dukshme në Katalonjë të Spanjës, ku policia lokale e lidh telefonin Google Pixel me krimin e organizuar, sidomos trafikun e drogës.
Shkaku nuk qëndron tek mënyra se si Google prodhon Pixel-in, por sepse këto pajisje përputhen me GrapheneOS, një sistem operativ alternativ që fokusohet te privatësia dhe siguria. GrapheneOS ofron enkriptim të fuqishëm të të dhënave, duke e bërë të vështirë për autoritetet të marrin të dhëna. Këto veçori i kanë bërë Pixel-ët mjete të preferuara për kriminelët që duan të shmangin ndjekjen.
Sipas policisë katalanase: “Çdo herë që shohim se një person përdor një Google Pixel, dyshojmë se është një trafikant droge.” Kriminelët shpesh heqin kamerat, GPS-in dhe mikrofonin për të minimizuar rrezikun e gjurmimit.
GrapheneOS mbështet modelet moderne si Pixel 8 dhe Pixel 9, për shkak të veçorive të avancuara të sigurisë në nivel harduerik, si memory tagging në çipat ARM V9. Komuniteti GrapheneOS i rekomandon këto pajisje për shkak të përditësimeve të gjata të sigurisë dhe natyrës së hapur për modifikime.
Për t’i kundërshtuar këto praktika, policia ka filluar të përdorë malware për të infektuar telefonat e të dyshuarve dhe për të hyrë në aplikacione, dokumente dhe të dhëna personale.
Edhe pse Google nuk e kishte këtë qëllim, kombinimi i sigurisë së lartë, fleksibilitetit, dhe mbështetjes për GrapheneOS e ka bërë Pixel-in zgjedhje tërheqëse për botën e krimit. Në Katalonjë, shfaqja e një Pixel-i shkakton më shumë se thjesht kuriozitet teknologjik — ajo ngre alarm për policinë.
Ekipi që qëndron pas GrapheneOS është, natyrisht, aspak i kënaqur që emri i tyre i mirë po njolloset, dhe anëtarët po flasin hapur për këto raportime nga Spanja.
Në X, llogaria zyrtare e GrapheneOS postoi: “Autoritarët evropianë dhe kanalet e tyre në media po e paraqesin gabim GrapheneOS dhe madje edhe telefonat Pixel sikur të ishin diçka për kriminelë. GrapheneOS është kundër shtetit policor të mbikëqyrjes masive që këta njerëz duan t’u imponojnë të gjithëve.”
