Fëmijët që përdorin tabletat e tyre për një orë më tepër në ditë kanë më shumë shance të jenë të zemëruar ose të nevrikosur një vit më vonë, sugjeron një studim.
Shumica e prindërve, në një moment, i kanë dhënë fëmijës së tyre një tablet për ta qetësuar kur qan. Por kini kujdes– pasi kjo mund të shkaktojë probleme të mëvonshme– thonë ekspertët. Një ekip nga Universite de Sherbrooke në Quebec u kërkoi 315 prindërve në Kanada që të regjistronin përdorimin e tabletit të fëmijës së tyre në moshën 3.5, 4.5 dhe 5.5 vjeç. Prindërve iu kërkua gjithashtu të raportonin nevrikosjet e fëmijës së tyre në këto mosha.
Në përgjithësi, fëmijët në studim shpenzonin mesatarisht 6.5 orë në javë – gati një orë në ditë – duke përdorur një tablet në moshën 3.5 vjeçare. Megjithatë, kjo përfaqësonte një ndryshim të madh midis fëmijëve të tjerë, me disa që nuk shpenzonin fare kohë në tablet në ditë, ndërsa të tjerët shpenzonin më shumë se pesë orë në ditë duke i përdorur ato.
Analiza zbuloi se në moshën 3.5 vjeç, çdo rritje në përdorimin e tabletave prej një ore e 15 minutash në ditë lidhej me një rritje prej 22% të zemërimit ose nevrikosjes deri në moshën 4.5 vjeç. Kjo mund të përfshijë skenarë të tillë si një fëmijë të zemërohet kur duhet të shkojë në shtrat, ose kur nuk e merr atë që dëshiron.
Nga ana tjetër, fëmijët që ishin më të zemëruar në moshën 4.5 vjeç kishin më shumë gjasa të kalonin më shumë kohë në tablet deri në moshën 5.5 vjeç. Duke shkruar në revistën Jama Pediatrics, studiuesit paralajmëruan se përdorimi i tabletave në fëmijërinë e hershme mund të ‘kontribuojë në një cikël që është i dëmshëm për rregullimin emocional’.
“Deri në moshën 3 vjeçare, fëmijët janë të aftë të përdorin vetë pajisjet mobile,” thanë studiuesit. “Në të vërtetë, prindërit raportuan se përdornin ekrane shpesh për t’i mbajtur fëmijët të zënë, pasi ata kryejnë detyra dhe punë të rëndësishme. Kjo sugjeron që përdorimi i tabletave shpesh mund të jetë një aktivitet i vetmuar për fëmijët, dhe për këtë arsye, mund të ofrojë pak mundësi për të mësuar dhe praktikuar strategjitë e rregullimit emocional.”
