Më herët gjatë kësaj jave, 19 vjeçari Jack Sweeney fitoi pak famë në internet kur Protocol publikoi një artikull mbi një nga bots-at e tij në Twitter, ElonJet. Në këtë adresë publikohen tweet-e të reja sa herë që avioni privat i Elon Musk ngrihet ose ulet në një aeroport të caktuar.
Sweeney ka krijuar disa bots të tjerë që përdorin informacionet publike të trafikut ajror për të ndjekur avionët privatë të personave mjaft të njohur si Bill Gates dhe Jeff Bezos. Megjithatë, ElonJet është adresa e tij më e famshme me 180,000 ndjekës. i gjithë ky popullaritet ka bërë që dhe vetë Elon Musk të mësojë rreth kësaj adrese.
Landed in Austin, Texas, US. pic.twitter.com/4l7tKiUspp
— Elon Musk’s Jet (@ElonJet) January 26, 2022
Ai i shkruajti Sweeney-t: “A mund ta mbyllësh këtë faqje? Përbën një rrezik për sigurinë time.” Më pas ai i ofroi 19 vjeçarit një shumë prej $5,000 për të mbyllur këtë adresë dhe për të mos lejuar “njerëzit e çmendur” të marrin vesh se ku Musk ndodhet.
Sweeney e përdori këtë rast për të bërë ofertën e tij dhe tha: “Ndonjë shanc që të rrisësh shumën në $50,000? Kjo do të ishte një mbështetje mjaft e madhe në universitet dhe ndoshta më lejon të blej një Model 3.”
Musk tha se ai do të mendonte për këtë ofertë, por nuk ka kontaktuar me Sweeney që nga ajo kohë. Prandaj adoleshenti vendosi të bënte publike bisedën e tij me miliarderin. “Unë kam punuar shumë në këtë adresë dhe $5,000 nuk janë të mjaftueshme.” tha ai.
