Për herë të parë në histori, një makinë elektrike – specifikisht Tesla Model Y – është tashmë makina më e shitur e momentit në botë. Sipas të dhënave të grumbulluara nga Jato Dynamics, Tesla Model Y ka tejkaluar numrin e shitjeve të Toyota RAV4 dhe Corolla përgjatë çerekut të parë të vitit 2023.
Ky është një lajm tepër interesant duke konsideruar se një Tesla Model Y kushton të paktën $47,490, një shifër shumë më e lartë në krahasim me një Corolla 2023 ($21,550) apo një RAV4 ($27,575).
Në bazë të informacioneve nga Jato Dynamics mësohet se Tesla ka shitur rreth 267,200 Model Y në të gjithë botën përgjatë tre mujorit të parë të 2023, ndërkohë që Toyota ka shitur 256,400 Corolla dhe 214,700 RAV4 për të njejtën periudhë. Kjo është përafërsisht një rritje me 69% e shitjeve vit pas viti, dhe Elon Musk duhet të jetë shumë i kënaqur nga kjo aritje. Musk besonte shumë se kërkesa për Model Y do të ishte e lartë që para se makina të prezantohej, pasi në 2016 ai parashikoi se tregu do të kërkonte 500,000 – 1,000,000 makina të tilla në vit.
Sigurisht kjo arritje nuk erdhi krejt papritur, pasi gjatë kohëve të fundit Tesla ka ulur disa herë çmimin e makinave elektrike, gjë që ka kontribuar në rritjen e numrit të shitjeve.
Megjithatë duhet të përmendim se Tesla nuk është shitësi më i madh i makinave elektrike, pasi kompanitë si Volkswagen, Toyota, General Motors dhe Ford kanë raportuar përfitime më të mëdha nga shitjet e këtyre makinave.
