TikTok lajmëroi ditën e enjte se është në fazat e para të testimit të chatbot-it të quajtur “Tako”, i cili do të ndërveprojë së shpejti me përdoruesit dhe do t’i ndihmojë ato të zbulojnë përmbajtje të reja në platformë. Fillimisht ky chatbot ka nisur të testohet në Filipine, dhe më pas mund të zgjerohet dhe në vende të tjera të botës.
TikTok tregoi se Tako është dizenjuar që të ndihmojë përdoruesit të “zbulojnë përmbajtje argëtuese dhe inspiruese” në aplikacion. Nga screenshots dhe videot e shpërndara në internet chatbot shfaqet në ndërfaqjen e TikTok si një ikonë në formën e një fantazme, në të cilën përdoruesit mund të klikojnë kur shikojnë video për të biseduar me tekst dhe për të marrë ndihmë në gjetjen e përmbajtjeve që kërkojnë.
Mediat e huaja raportojnë se kompania mëmë e TikTok, ByteDance, po zhvillon një model gjuhësor AI tepër të madh, por që nuk është duke u testuar në aplikacionin ekuivalent të TikTok në Kinë, Douyin.
Kur një zëdhënës i TikTok u pyet në lidhje me Tako, ai tregoi se kompania vazhdimisht po eksploron teknologjitë e reja. “Në tregje të caktuara, ne kemi nisur testimin e mënyrave të reja për të fuqizuar kërkimin dhe zbulimin e videove në TikTok, dhe mezi po presim që të mësojmë nga komuniteti ynë ndërkohë që vazhdojmë të krijojmë një hapësirë të sigurtë që argëton, inspiron kreativitet dhe nxit ndryshime kulturore.” tha ai.
Ndryshe nga ChatGPT, që është një chatbot për të gjitha kërkesat, Tako duket si një asistent navigimi i cili inkurajon ndjekësit të shikojnë më tepër video.
