Krjiuesit në YouTube duhet të përgatiten për t’i dhënë lamtumirën shërbimit “Stories”, pasi vetë platforma ka konfirmuar se duke nisur nga data 26 qershor, përdoruesit nuk do të jenë në gjendje të publikojnë një story. Deri në këtë datë ju mund t’i shfrytëzoni akoma YouTube Stories, të cilat zhduken pas 7 ditësh nga ngarkimi.
Për herë të parë YouTube Stories u publikuan në platformë në vitin 2017 (fakt interesant: YouTube Stories në fillim quheshin “reels”, por më pas YouTube vendosi të ndryshonte emrin dhe ta prezantonte shërbimin në mbaër botën).
Gjatë viteve të fundit ne kemi parë se si kompani të ndryshme vendosën të “huazonin” formatin e Stories të krijuar fillimisht nga Snapchat, duke nisur që nga Instagram e deri tek Twitter, YouTube apo dhe LinkedIn. Megjithatë duket se ky shërbim nuk rezultoi shumë i suksesshëm në YouTube, prandaj do të eleminohet së shpejti.
Në të vërtetë kjo platfomë nuk ka shumë nevojë për Stories, pasi mund t’i zëvëndësojë ato lehtësisht me Shorts, videot e formatit të ngjashëm me TikTok. Krijuesit mundet gjithashtu të përdorin shërbimin Community për të shpërndarë informacione të reja drejt audiencës së tyre.
YouTube tregoi se “krijuesit që përdorin postimet dhe stories gjeneronin më tepër ndërveprime në postime se në Stories”.
