Kompania Volvo në një deklaratë për mediat është shprehur se po përkushtohët për t’u bërë një lider në tregun e makinave premium elektrike dhe planifikon shndërrimin në një kompani që prodhon vetëm makina elektrike në vitin 2030. Tranzicioni ambicioz i Volvo drejt shndërrimit në një prodhues makinash tërësisht elektrike është pjesë e një plani që kërkon të reduktojë sasinë e karbonit në atmosferë nëpërmjet masave konkrete.
Volvo C40 Recharge është makina më e re tërësisht elektrike nga kompania Volvo. Shefi i teknologjisë, Henrik Green, tha se kjo makinë përfaqëson të ardhmen e Volvo-s. C40 Recharge vjen me një dizajn mjaft tërheqës të bazuar në platformën e automjeteve CMA. Bateria 78kWh mbështet motorët që ndodhen në boshtin e parmë dhe të pasëm duke ju ofruar një autonomi prej 420 km, e cila mund të përmirësohet në updatet e reja over-the-air. C40 Recharge mund të karikohet në 80% për 40 minuta.
Interiori i C40 Recharge siguron një pozicion ulje të lartë, ngjyra të kombinuara, opsione zbukuruese dhe për herë të parë në makinat Volvo nuk është përdorur lëkurë.
Nëpërmjet ekranit touchscreen ju do të mund të bëni veprime të shumta pasi ajo navigon në sistemin operativ Android, që përmban dhe aplikacionet e Google si Maps, Assistant dhe Play Store.
Makina elektrike do të ofrohet të blihet direkt nga interneti, duke bërë gjithçka shumë të thjeshtë për konsumatorin. Bashkë me makinën do të vijë dhe paketa e kujdesit që përfshin shërbimin, garancinë dhe ndihmën në rrugë. Prodhimi do të nisë këtë vjeshtë në fabrikën e makinave Volvo në Ghent, Belgjikë.
