Një emër legjendar i teknologjisë si Commodore po rikthehet në skenë jo me një PC apo konsolë retro, por me një telefon me kapak. Po, një flip phone në vitin 2026.
Rikthimi i Commodore nisi rreth një vit më parë, kur Christian Simpson, i njohur si “Peri Fractic”, bleu kompaninë dhe të gjitha markat zyrtare historike të saj. Që prej asaj kohe, brandi ka prezantuar produkte si Commodore 64 Ultimate dhe 64X PC, por tani po hedh hapin më të guximshëm me Commodore Callback 8020.
Ky telefon përfiton nga vala në rritje e “dumb phones”, pajisje që synojnë të reduktojnë varësinë nga ekranet. Callback 8020 ka internet, por bllokon shfletuesit dhe rrjetet sociale direkt në nivel sistemi, përmes teknologjish në proces patentimi. Madje, edhe nëse dikush gjen mënyrë t’i instalojë, aksesimi i serverëve bllokohet në nivel DNS.
Telefoni përdor Sailfish OS, sistem operativ i zhvilluar nga Jolla, një kompani e krijuar nga ish-punonjës të Nokia. Falë një shtrese kompatibiliteti, pajisja mbështet mbi 99% të aplikacioneve Android, përfshirë Spotify, Signal dhe WhatsApp.
Në stil të pastër nostalgjik, Callback 8020 sjell lojëra të epokës Commodore 64, një player muzikor 8-bit SID, radio FM, dalje 3.5 mm për kufje dhe madje vjen me in-ear monitors në kuti. Me çmim 500–640 dollarë dhe nisje dërgesash në tremujorin e katërt, pyetja është e thjeshtë, a jemi gati të paguajmë për thjeshtësinë?
