Një praktikë shqetësuese po del në pah në industrinë e inteligjencës artificiale. Sipas një investigimi të New Scientist, shumë nga personat që paguhen për të trajnuar modelet më të avancuara të AI po përdorin vetë chatbot-e si ChatGPT për të kryer detyrat e tyre, një praktikë që shkel rregullat e kompanive dhe mund të ndikojë negativisht në cilësinë e modeleve të së ardhmes.
Trajnimi i modeleve të mëdha gjuhësore nuk mbështetet më vetëm te të dhënat e mbledhura nga interneti. Kompanitë po investojnë gjithnjë e më shumë në krijimin e bisedave dhe testeve të realizuara nga njerëz, të cilat shërbejnë si materiale me cilësi të lartë për të përmirësuar performancën e AI. Megjithatë, shumë prej këtyre punonjësve punojnë me kontrata të përkohshme dhe pagesa të ulëta, duke i shtyrë të kërkojnë mënyra më të shpejta për të përfunduar detyrat.
Disa punonjës anonimë thanë se përdorimi i ChatGPT është bërë një praktikë e zakonshme. Ata shpjegojnë se, nëse dihet si të maskohet stili tipik i një modeli AI, është shumë e vështirë që kompanitë ta zbulojnë mashtrimin. Edhe pse disa platforma monitorojnë ekranet e punonjësve përmes mjeteve të posaçme, përdoruesit shpesh gjejnë mënyra për t’i shmangur kontrollet.
Ekspertët paralajmërojnë se kjo mund të krijojë një problem afatgjatë për të gjithë industrinë. Nëse modelet e reja trajnohen me përmbajtje të krijuar nga modele të tjera AI, ato rrezikojnë të humbasin gradualisht cilësinë dhe aftësinë për të prodhuar rezultate natyrale. Ky fenomen njihet si “model collapse”, ose ndryshe “AI cannibalism“, ku inteligjenca artificiale fillon të “ushqehet” me përmbajtjen e saj.
Sipas studiuesit Mark Lee nga Universiteti i Birminghamit, skenari më ekstrem është i pamundur për momentin, pasi një pjesë e konsiderueshme e të dhënave vazhdon të krijohet nga njerëzit. Megjithatë, ai thekson se edhe një sasi e kufizuar përmbajtjeje të gjeneruar nga AI gjatë procesit të trajnimit mund të ulë cilësinë e modeleve dhe t’i bëjë ato më pak efektive në detyrat që kërkojnë të kuptuarit e sjelljes njerëzore.
Rasti nxjerr në pah edhe një problem tjetër të industrisë së AI. Ndërsa kompanitë investojnë miliarda për zhvillimin e modeleve të reja, një pjesë e rëndësishme e procesit mbështetet te punonjës të kontraktuar me paga të ulëta, të cilët shpesh ndihen të detyruar të përdorin vetë inteligjencën artificiale për të përmbushur objektivat e tyre.
