Shumë persona pëlqejnë të kërkojnë në Google Maps për një restorant të caktuar para se të konsumojnë një drekë apo darkë në të, për të parë menunë që këto vende ofrojnë apo fotografime të ushqimeve që mund të jenë bërë nga stafi apo dhe nga klientët e restorantit.
Për të gjithë këta persona Google ka vendosur të ofrojë një shërbim tepër të rëndësishëm, i cili bën të mundur që fotografitë e ushqimeve të përshtaten me emrin përkatës në menunë e restorantit. Klientët potencialë do të mund ta shikojnë këtë ndryshim në kategorinë Photos të restorantit apo kafenesë, në një kartë të vendosur poshtë publikimit.
Në këtë kartë do të tregohet emri i produktit si dhe përshkrimi që ai ka në menu. Gjithashtu në raste të tjera ju mund të shikoni çmimin apo kategorizimin “Popular” apo “Vegetarian”. Ju gjithashtu mund të sugjeroni një editimi të emërtimit të ushqimit apo të gjeni një fotografim të menusë.
Për të bërë të mundur këtë shërbim duket se Google Maps po përdor informacionin e futur nga përdoruesit si dhe teknologjinë e njohjes së objekteve. Jo të gjitha fotografitë e ushqimeve janë të kategorizuara në këtë mënyrë, mirëpo gjithsesi ky është një hap i hedhur në drejtimin e duhur nga ana e Google, pasi përshkrimet e ushqimeve në Maps nuk janë aq të zakonshme.
