OpenAI ka njoftuar se po zhvillon një platformë të re punësimi me inteligjencë artificiale, e quajtur OpenAI Jobs Platform, që synon të lidhë kompanitë me punonjësit duke përdorur teknologjinë AI. Shërbimi pritet të lançohet në mesin e vitit 2026 dhe do të konkurrojë drejtpërdrejt me LinkedIn.
Fidji Simo, CEO i aplikacioneve në OpenAI, tha në një postim në blog se platforma do të ndihmojë në krijimin e “përputhjeve perfekte” midis nevojave të kompanive dhe aftësive të punëtorëve. Do të ketë gjithashtu një seksion të dedikuar për bizneset e vogla dhe qeveritë lokale për të zbuluar talentët. Ky projekt është pjesë e zgjerimit të OpenAI përtej ChatGPT, së bashku me aplikacione të tjera që kompania po shqyrton, si një shfletues dhe një rrjet social.
Lëvizja vendos OpenAI në një kurs përplasjeje me LinkedIn, i cili është në pronësi të Microsoft – investitori më i madh i OpenAI. Ironikisht, LinkedIn u themelua nga Reid Hoffman, një prej mbështetësve të hershëm të OpenAI. Vetë LinkedIn ka integruar veçori AI për të ndihmuar në përputhjen e kandidatëve me vendet e punës.
Pjesë e kësaj iniciative është edhe OpenAI Academy, e cila do të ofrojë certifikime për nivele të ndryshme të “AI fluency”. OpenAI ka bashkëpunuar me Walmart, një nga punëdhënësit më të mëdhenj globalë, me synimin për të certifikuar 10 milionë amerikanë deri në 2030.
Megjithatë, kjo vjen në një kohë kur shumë ekspertë paralajmërojnë se AI do të zhdukë miliona vende pune tradicionale. CEO i Anthropic, Dario Amodei, ka theksuar se deri në vitin 2030 mund të zhduken deri në 50% e vendeve të punës fillestare. Simo e pranoi këtë rrezik, por shtoi se OpenAI synon të ndihmojë punëtorët të përshtaten duke i pajisur me aftësi të reja.
Programet e reja prezantohen gjithashtu si pjesë e angazhimit të OpenAI në iniciativën e Shtëpisë së Bardhë për të zgjeruar edukimin mbi AI.
