A janë fëmijët tuaj të fiksuar pas dinosaurëve? Nëse kjo është e vërtetë, atëherë kemi një lajm të mirë për ju – ekspertët thonë se fëmijët që janë të fiksuar pas dinosaurëve janë më inteligjentë! Nëse fëmija juaj ka ditëlindjen apo dëshironi t’i bëni një dhuratë për festa, mund të mendoni t’u merrni atyre një lodër dinosaur ose disa libra për dinosaurët, sepse shkenca ka zbuluar se në fakt kjo gjë i bën ata më inteligjentë.
Përse ndodh kjo?
Sipas një studimi të kryer në vitin 2008, fëmijët që tregonin interesa të veçanta kishin një nivel të shtuar njohurish dhe këmbëngulje, një aftësi më të mirë për t’u përqëndruar për kohë të gjata dhe aftësi më të thella të përpunimit të informacionit. Në thelb, ata u zbuluan se ishin më të zgjuar në mesin e bashkëmoshatarëve të tyre (veçanërisht për moshat 4-6 vjeç).
Një studim tjetër në 2007 gjeti rezultate të ngjashme: “Një e treta e fëmijëve të vegjël kanë interesa jashtëzakonisht të forta.” Nga këto interesa, makinat dhe dinosaurët renditeshin në krye dhe fëmijët e fiksuar pas tyre, u zbuluan se ishin më të zgjuar se bashkëmoshatarët e tyre. Duke qenë se dinosaurët janë zhdukur shumë kohë më parë, ata bëjnë që fëmijët të aktivizojnë imagjinatën e tyre. Fëmijët mund të krijojnë historitë dhe skenarët e tyre se si ishin dinosaurët në të shkuarën, gjë që nxit kreativitetin.
Kelli Chen, një terapiste psikiatrike pediatrike në Johns Hopkins tha për CNN: “Një fiksim, në këtë rast pas dinosaurëve, mund të jetë një mënyrë argëtuese e të mësuarit për një fëmijë. Bërja e pyetjeve, gjetja e përgjigjeve dhe fitimi i ekspertizës është procesi i të mësuarit në përgjithësi. Eksplorimi i një teme dhe zotërimi i saj është i dobishëm sepse kështu formojmë karriera si të rritur. Profesioni kryesor i një fëmije është loja, kështu që ata po e bëjnë punën e tyre duke luajtur me gjërat për të cilat janë të interesuar të mësojnë.”
