Google tregon se përgjatë një dite, njerëzit kërkojnë mbi 8.5 miliardë herë në motorin e kërkimit. Dhe pse një numër kaq i madh përdoruesish e përdorin vazhdimisht këtë shërbim, shumë prej tyre nuk e dinë ende funksionin e ikonës së mësipërme që gjendet në pothuajse çdo browser në ndërfaqjen kryesore.
Një studim nga Cardiff Metropolitan University zbuloi se ndërsa 63% e njerëzve mendojnë se e dinë kuptimin pas këtij simboli, vetëm 7% e dinë në të vërtetë. Ndryshe nga sa mendojnë shumica, simboli nuk do të thotë se website është i sigurt, i besueshëm ose ka më shumë gjasa të jetë i vërtetë. Në vend të kësaj, simboli i drynit tregon vetëm se të dhënat e dërguara nga kompjuteri juaj janë të enkriptuara.
Studiuesja kryesore Fiona Carroll anketoi 528 njerëz të moshës 18 deri në 86 vjeç, duke i pyetur ata se çfarë do të thoshte ‘ikona e drynit’ në shiritin e browser-it Google Chrome. Shumë të anketuar që ishin të sigurt se e dinin se çfarë do të thoshte ikona, besonin se dryni tregonte se website ishte i sigurt në një farë mënyre.
Kjo ikonë do të thotë që komunikimet ndërmjet serverit të faqes së internetit dhe kompjuterit të përdoruesit janë të koduara me një sistem të quajtur HTTPS. Komunikimet nuk mund të përgjohen nga një palë e tretë, por vetë faqja mund të jetë ende e pasigurt.
