Tashmë kanë kaluar gati pesë muaj nga prezantimi i shërbimit të rrjeteve sociale të Meta, Threads. Por në vend që përdoruesit ta shijojnë aplikacionin e ri, shumë njerëz në mediat sociale duken të mërzitur thjesht nga rikujtimi i vazhdueshëm se ai ekziston.
Përdoruesit e Instagram kanë vënë re se po bombardohen me njoftime Threads që përpiqen t’i bëjnë ata të kalojnë në aplikacionin e ri. Një përdoruese tha se ajo është ende duke marrë njoftime Threads në Instagram edhe pas fshirjes së llogarisë së saj Threads. Nëse vazhdoni të shihni njoftime në Instagram për Threads, ja se si t’i limitoni ato.
Kur një përdorues merr një njoftim në Instagram, ikona e zemrës në krye të aplikacionit merr një pikë të vogël të kuqe. Zakonisht, duke klikuar në ikonën e zemrës, përdoruesit mund të shohin aktivitetin që lidhet me Instagram, si p.sh. një përdorues tjetër që pëlqen ose komenton në një foto tuajën.
Mirëpo tani në këto njoftime po shfaqen mesazhe që u thonë përdoruesve se dikush ‘ka postuar së fundi një Thread të ri’ – edhe pse Threads dhe Instagram janë dy aplikacione të veçanta.
E vetmja mënyrë për të limituar marrjen e këtyre njoftimeve është duke shkuar në Settings të aplikacionit dhe për të ndaluar marrjen e njoftimeve. Megjithatë ky veprim nuk do të mund të ndalojë shfaqjen e pikave të kuqe në ikonën e zemrës në Instagram, që mund të jetë disi e bezdisshme, por të paktën nuk do të merrni më njoftime kur aplikacioni nuk është hapur.
