Disa muaj më parë në Geek Room raportuam se si Autoriteti i Mediave Audiovizive të Shqipërisë kishte arritur një marrëveshje me TikTok për të bërë të mundur eliminimin e përmbajtjeve të dëmshme dhe denigruese të postuara në platformë në të cilat është përdorur gjuha shqipe.
Ishte disi e vështirë më parë për TikTok që të eliminonte këto video nga platforma për shkak të barrierës së gjuhës, megjithatë AMA rezultoi të jetë një ndërmjetës i rëndësishëm për përmirësimin e komunitetit në rrjetin social TikTok.
Kësaj here nëpërmjet një postimi në LinkedIn, kryetarja e AMA-s, Armela Krasniqi publikoi raportin e parë të krijuar që nga nisja e bashkëpunimit me TikTok për raportimin e videove të dëmshme për komunitetin online. Nga ky postim bëhet e ditur se numri total i ankesave të ardhura në website-in e posaçëm të AMA ishte 486.
Megjithatë pas kontrollimeve të bëra dhe nga personeli përkatës në AMA rezultoi se 154 prej këtyre videove janë vlerësuar në shkelje të ligjit. 149 video janë fshirë tashmë nga kjo platformë, ndërkohë që 5 të tjera janë ende në shqyrtim.
Një tjetër sfidë e rëndësishme në këtë platformë është dhe ajo kundër piraterisë, dhe AMA ka bërë të mundur raportimin dhe fshirjen e pothuajse 1000 videove që reklamonin piraterinë.
Numri total i videove të raportuara për pirateri arriti në 986 dhe të gjitha këto video janë fshirë tashmë nga TikTok. Në të njëjtin rrugëtim, u bë i mundur mbyllja e 131 profileve të ndryshme për përmbajtje të piratuara.
Në postim znj. Krasniqi inkurajon të gjithë qytetarët të raportojnë video të tilla në website-in e dedikuar të AMA për ta bërë komunitetin e TikTok sa më të sigurt.
