Gjatë kohëve të fundit kemi parë mjaft video të ndryshme të shpërndara në TikTok të cilat janë bërë virale jo për informacionin e rëndësishëm që shpërndajnë, por për shkak të banalitetit të tyre.
Edhe pse ne jemi munduar t’i raportojmë këto përmbajtje të papërshtatshme që shfaqen në feed-in tonë, TikTok nuk ka mundur të marrë masa për fshirjen e tyre pasi sistemi nuk e njeh gjuhën shqipe, e për këtë arsye nuk mund të gjykojë.
Me sa duket ekzistonte nevoja për një ndërmjetës që do të bënte të mundur këto operacione, dhe ky ndërmjetës do të jetë një autoritet ligjor i Qeverisë Shqiptare, Autoriteti i Mediave Audiovizive (AMA). Përveç rolit si një rregullator në industrinë e transmetimit dhe telekomunikacionit në Shqipëri, AMA ka arritur një marrëveshje bashkëpunimi me TikTok për eliminimin e përmbajtjeve të dëmshme të postuara në platformë.
Kjo gjë u bë e ditur përmes një postimi në rrjetet sociale nga Armela Krasniqi, kryetare e AMA-s, e cila tregoi se tashmë ankesat e qytetarëve do t’i transmetohen drejtpërdrejt TikTok për eliminimin e përmbajtjeve të papërshtatshme në platformë.
Ajo ftoi që të gjithë personat të raportojnë çdo postim të dëmshëm, që nxit dhunë, që përmban gjuhë urrejtje apo që cënon të drejtat e fëmijëve dhe komuniteteve në linkun e dedikuar të AMA.
Që të gjithë ne mund të ndihmojmë në shndërrimin e TikTok në një hapësirë më miqësore për përdoruesit. Stafi i Geek Room do e monitorojë suksesin e kësaj forme ankimimi duke raportuar herë pas here dhe duke bërë publike raportimet tona.
